А Серия. «Милан» кутилмаганда «Удинезе»га йирик ҳисобда мағлуб бўлди

Италия А Сериясининг 32-тури доирасида «Милан» ва «Удинезе» жамоалари ўртасидаги учрашув якунланди. «Сан-Сиро» стадионида кечган баҳсда меҳмонлар 3:0 ҳисобидаги кутилмаган ғалабани қўлга киритишди.

Ўйиннинг 26-дақиқасида мезбонлар ҳимоячиси Давиде Бартецаги ўз дарвозасини ишғол қилиб қўйди. 37-дақиқада яримҳимоячи Юрген Эккеленкамп «Удинезе»нинг устунлигини оширди. Иккинчи бўлимнинг 71-дақиқасида эса Артюр Атта ҳисобни йирик кўринишга келтирди.

Айни дамда «Удинезе» 32 та ўйиндан сўнг 43 очко жамлаган ҳолда турнир жадвалида 10-ўринни эгаллаб турибди. «Милан» эса 63 очко билан учинчи поғонадан жой олган.

Насрулло Каримов

Журналист