А Серия. «Интер» пешқадамлигини мустаҳкамлади, «Милан» эса мағлубиятга учради ва бошқа натижалар
23 феврал куни Италия чемпионатининг 26-тур баҳслари якунланди. Турнинг энг шов-шувли натижаси турнир жадвали етакчиларининг ўз майдонидаги мағлубиятлари бўлди.
Турнинг очилиш ўйинида жума куни «Сассуоло» ўз майдонида «Верона»ни 3:0 ҳисобида қийинчиликсиз мағлуб этди. Шанба куниги баҳслар ҳақиқий сенсациялар билан бошланди: «Ювентус» ўз уйида «Комо»га 0:2 ҳисобида имкониятни бой бериб қўйди. «Интер» эса меҳмонда «Лечче» устидан 2:0 ҳисобида ишончли ғалабага эришди. «Кальяри» ва «Лацио» ўртасидаги баҳсда ҳисоб очилмади.
Якшанба куни марказий учрашувда «Аталанта» ўз майдонида «Наполи»ни 2:1 ҳисобида таслим этди. Турнинг яна бир кутилмаган натижаси Миланда қайд этилди — «Милан» ўз мухлислари қаршисида «Парма»га 0:1 ҳисобида ютқазиб қўйди. Шунингдек, «Женоа» «Торино»ни (3:0), «Рома» эса «Кремонезе»ни (3:0) йирик ҳисобда мағлуб этди.
Душанба куниги ўйинларда «Фиорентина» «Пиза»ни 1:0, «Болонья» эса «Удинезе»ни 1:0 ҳисобида мағлубиятга учратиб, муҳим очколарни қўлга киритди.
Маълумот учун, 26-турдан сўнг «Интер» 64 очко жамғарган ҳолда пешқадамликни янада мустаҳкамлади. «Милан» 54 очко билан иккинчи поғонани сақлаб қолган бўлса-да, пешқадам билан орадаги фарқ 10 очкога етди. Кучли учликни 50 очко билан «Наполи» якунлаб турибди.
