A Seriya. «Inter» peshqadamligini mustahkamladi, «Milan» esa magʻlubiyatga uchradi va boshqa natijalar
23 fevral kuni Italiya chempionatining 26-tur bahslari yakunlandi. Turning eng shov-shuvli natijasi turnir jadvali yetakchilarining o‘z maydonidagi mag‘lubiyatlari bo‘ldi.
Turning ochilish o‘yinida juma kuni «Sassuolo» o‘z maydonida «Verona»ni 3:0 hisobida qiyinchiliksiz mag‘lub etdi. Shanba kungi bahslar haqiqiy sensatsiyalar bilan boshlandi: «Yuventus» o‘z uyida «Komo»ga 0:2 hisobida imkoniyatni boy berib qo‘ydi. «Inter» esa mehmonda «Lechche» ustidan 2:0 hisobida ishonchli g‘alabaga erishdi. «Kalyari» va «Latsio» o‘rtasidagi bahsda hisob ochilmadi.
Yakshanba kuni markaziy uchrashuvda «Atalanta» o‘z maydonida «Napoli»ni 2:1 hisobida taslim etdi. Turning yana bir kutilmagan natijasi Milanda qayd etildi — «Milan» o‘z muxlislari qarshisida «Parma»ga 0:1 hisobida yutqazib qo‘ydi. Shuningdek, «Jenoa» «Torino»ni (3:0), «Roma» esa «Kremoneze»ni (3:0) yirik hisobda mag‘lub etdi.
Dushanba kungi o‘yinlarda «Fiorentina» «Piza»ni 1:0, «Bolonya» esa «Udineze»ni 1:0 hisobida mag‘lubiyatga uchratib, muhim ochkolarni qo‘lga kiritdi.
Maʼlumot uchun, 26-turdan so‘ng «Inter» 64 ochko jamg‘argan holda peshqadamlikni yanada mustahkamladi. «Milan» 54 ochko bilan ikkinchi pog‘onani saqlab qolgan bo‘lsa-da, peshqadam bilan oradagi farq 10 ochkoga yetdi. Kuchli uchlikni 50 ochko bilan «Napoli» yakunlab turibdi.
