50 миллион, лекин ўйнамаяпти: Ўзбекистонда Хусановга нисбатан шубҳалар пайдо бўлди
Ўзбекистонлик футбол шарҳловчиси Отабек Жўраев миллий жамоа ва англиялик «Манчестер Сити» ҳимоячиси Абдуқодир Хусановнинг жисмоний ҳолати борасида хавотир билдирди. Бу ҳақда у ЖЧ-2026 саралаш босқичида БААга қарши ўйин арафасида «Финт Тураева» YouTube-каналида гапирди.
Жўраевнинг таъкидлашича, ҳужум ва яримҳимояда барқарорлик кузатилаётган бўлса-да, ҳимоя чизиғида муаммолар бор.
— Барча чизиқларимизда барқарорлик бор, фақат ҳимояда эмас. Хусанов, Ашурматов, Аликулов — гўёки асосий учлик, лекин Хусанов умуман ўйнамаяпти. У қандай формада эканини фақатгина Тимур Кападзе билади, — деди Жўраев.
Шарҳловчи шунингдек, футболчининг трансфер баҳоси эмас, балки унинг амалдаги ўйин амалиёти муҳим эканини таъкидлади:
— Қоғозда Хусанов 50 миллион доллар, лекин унинг машғулотларини фақат Кападзе кўряпти.
Абдуқодир Хусанов 2025 йил январ ойида Франциянинг «Ланс» жамоасидан «Манчестер Сити»га ўтган эди. У «шаҳарликлар» сафида 9 та ўйин ўтказиб, 1 та гол урди. Бироқ сўнгги учрашувларда майдонга тушмади, ҳатто баъзан жамоа рўйхатига ҳам киритилмади.
