366 миллион евро сарфлаб, сўнгги ўринга тушган “Тоттенҳем”
“Тоттенҳем” ёзги трансферлар ойнасида таркибини кучайтириш учун қарийб 366 миллион евро сарфлади. Бироқ улкан харажатлар ҳозирча натижага айланмади — Лондон клуби 2026/27-йилги Англия Премьер-лигасининг дастлабки беш турида бирорта ҳам ғалаба қозона олмади ва атиги 2 очко билан турнир жадвалининг сўнгги поғонасида бормоқда.
Ёзда Роберто Де Дзерби бошчилигидаги жамоа таркиби жиддий янгиланди. Клуб Сандро Тонали, Матеуш Фернандеш, Савиньо ва Ян Пол ван Хекке каби футболчиларни катта маблағ эвазига сотиб олди. Трансферлар орасида энг қиммати Сандро Тонали бўлди — “Тоттенҳем” италиялик ярим ҳимоячи учун “Ньюкасл”га 108 миллион евро тўлади.
Шунга қарамай, янги футболчилар ҳам жамоанинг мавсум бошидаги муаммоларини ҳал қила олмади. “Тоттенҳем” “Ноттингем Форест” ва “Эвертон” билан голсиз дуранг қайд этди, Премьер-лигадаги дастлабки голларини эса фақат бешинчи турда “Астон Вилла”га қарши учрашувда урди. Лондонликлар ўша баҳсда ҳам 2:3 ҳисобида мағлубиятга учради.
Маълумот учун, “Тоттенҳем” сўнгги икки мавсумнинг ҳар бирини АПЛда 17-ўринда якунлаган. Клуб ёзги йирик трансфер кампанияси орқали вазиятни тубдан ўзгартиришни режалаштирган эди, аммо янги мавсум старти ҳозирча бунинг аксини кўрсатмоқда.
