19 ёшли «Қайрат» тарбияланувчиси ўйин вақтида вафот этди
19 ёшли «Қайрат» академияси тарбияланувчиси Диас Толеу Қозоғистон биринчи лигасининг 25-туридан ўрин олган «Хан Тенгри» — «Екибастуз» учрашуви вақтида вафот этди. Бу ҳақда ҚФФ матбуот хизмати хабар берди.
Манбага кўра, футболчи баҳснинг 65-дақиқасида ҳеч қандай тўқнашувсиз майдонга йиқилиб тушган, шундан сўнг у зудлик билан тиббий ёрдам кўрсатиш учун майдондан олиб чиқилган. Бироқ 16 октябрь куни кечқурун Толеу кўрсатилган муолажаларга қарамай вафот этган.
Маълумот учун, Диас Толеу 2006 йилнинг 4 май куни Олмаотада туғилган ва «Қайрат» академиясида таҳсил олган. У 2024 йилнинг апрель ойида «Хан Тенгри» жамоаси сафига қўшилган эди.
Ёш вингер жорий мавсум биринчи лигада 18 та ўйинда майдонга тушди. Шунингдек, Толеу «Қайрат»нинг ёшлар жамоасида 15 та учрашувда қатнашиб, 3 та гол урган ва 2 та голли узатмани амалга оширган.
