18 ёшли француз Мбаппени ўғирлашни режалаштирганликда гумон қилинмоқда
Францияда 18 ёшли йигит Килиан Мбаппени ўғирлаш режасига алоқадорликда гумон қилинмоқда. Le Parisien маълумотига кўра, Клеман Л. исмли шахс бир қатор уй босқинлари ва одам ўғирлаш режаларининг ташкилотчиларидан бири сифатида тергов қилинмоқда.
Тергов маълумотларига кўра, жиноий гуруҳнинг нишонлари орасида тадбиркорлар, рэперлар ва таниқли спортчилар бўлган. “Реал Мадрид” ҳужумчиси Килиан Мбаппе ҳам ўғирлаш режалаштирилган шахслар рўйхатига киритилган. Ҳозирча футболчини ўғирлашга амалий уриниш бўлгани ҳақида маълумот йўқ — гап тайёрланаётган режа ҳақида кетмоқда.
18 ёшли гумондор 21-август куни Нантерда шериги билан бирга қўлга олинган. У ҳозир ҳибсда ва алоҳида сақланмоқда, унинг гумон қилинаётган шериги эса суд назорати остида озодликка чиқарилган. Тергов доирасида апрель ва август ойлари оралиғида Франциянинг бир нечта ҳудудида содир этилган ёки режалаштирилган жиноятлар ўрганилмоқда.
Маълумот учун, Le Parisien хабарига кўра, гуруҳ жами 26 нафар шахсни нишонга олган бўлиши мумкин. Улар орасида футболчилар, рэперлар ва бадавлат тадбиркорлар бор.
