Зинедин Зидан Франциянинг машҳур Клерфонтендаги «мода намойиши»га чек қўйди
Зинедин Зидан Франциянинг машҳур Клерфонтендаги «мода намойиши»га чек қўйди
Франция миллий жамоасининг янги бош мураббийи футболчиларнинг миллий жамоа йиғинига келиш пайтидаги кийинишлари атрофида юзага келадиган шов-шувли анъанага барҳам берди. Энди «Уч ранглилар» футболчиларининг Клерфонтенга келишини журналистлар аввалгидек тасвирга ола олмайди.
Халқаро танаффус бошланиши билан Франция миллий жамоаси Париж чеккасидаги Клерфонтен базасига йиғиларди. Ҳар сафар футболчиларнинг келиши ўзига хос мода намойишига айланиб, автотураргоҳ фотомухбирлар учун ҳақиқий «подиум» вазифасини бажарарди.
Футболчилар машиналаридан тушиб, камералар қаршисида суратга тушар, машҳур дизайнерлар брендларининг қимматбаҳо кийимларида ўз услубларини намойиш этишарди.
Кимдир нафис ва классик кўринишга эга бўлса, бошқалари ноодатий ва ҳатто ғалати образларни танларди. Уларнинг аксарияти ниҳоятда қиммат бўлган бу кийимлари туфайли Франция миллий жамоасининг йиғинга келиши ижтимоий тармоқларда тез-тез муҳокама қилинardi.
Футболчиларнинг ўзлари ҳам бу анъанага фаол қўшилиб, майдондан ташқаридаги шахсий услубларини намойиш этишдан завқланишарди.
Бироқ Клерфонтендаги «мода подиуми» энди тарихда қолди. Франция миллий жамоасининг янги бош мураббийи Зинедин Зидан бу футбол маданиятининг ўзига хос қисмига айланган анъанага кескин нуқта қўйди.
Зидан қатъий қоидалар жорий қилмоқда
Дидье Дешам ёзда миллий жамоадан кетганидан сўнг унинг ўрнини эгаллаган Зидан дастлабки кунларданоқ ўз талабларини жорий қила бошлади.
Франция ва «Реал Мадрид» афсонаси асосий эътиборни майдондаги ишга қаратмоқчи. Шу сабабли у оммавий ахборот воситалари учун ҳам бир қатор чекловлар ўрнатди.
Жумладан, Зидан халқаро танаффус бошида футболчиларнинг Клерфонтенга келишини журналистлар томонидан тасвирга олишни тақиқлади. Энди футболчиларнинг йиғинга келиши ҳақидаги суратлар фақат Франция футбол федерациясининг расмий каналлари орқали эълон қилинади.
Испаниянинг AS нашри ёзишича, бу қарор футболчиларни ҳимоя қилиш ва уларнинг кийимлари атрофида кераксиз шов-шув юзага келишининг олдини олиш мақсадида қабул қилинган.
Зидан Франция миллий жамоасининг илк таркибини эълон қилган матбуот анжуманида ҳам телевизион камералар бўлишини истамади. Анжуман Франция футбол федерациясининг расмий каналлари орқали намойиш этилди.
Шунга қарамай, журналистларга айрим машғулотларни кузатиш ҳамда махсус аралаш зонада футболчилардан интервью олишга рухсат берилди. Бу жиҳатдан Зидан давридаги тартиб Дешам давридагидан фарқ қилади.
Футболчиларнинг ўзига ҳам янги қоидалар таъсир кўрсатмоқда. L’Équipe хабарига кўра, Зидан Клерфонтен базасига хусусий сартарошларнинг киришини ҳам тақиқлаган.
Мураббий миллий жамоа базасини ташқи таъсирлардан ҳимояланган ҳудудга айлантириб, футболчиларнинг эътиборини фақат миллий жамоа ва футболга қаратмоқчи.
Клерфонтендаги «мода подиуми» қачон бошланган?
Футболчиларнинг Клерфонтенга келишда энг яхши кийимларини кийиб, фотомухбирлар қаршисида суратга тушиши янги анъана эмас.
Архивларга назар ташласак, Франция футболчилари миллий жамоа базасига келганида энг яхши либосларини намойиш этиб, уларни кутиб турган журналистларга суратга тушиб келаётганига 15 йилдан ошганини кўриш мумкин.
Бу анъана Лоран Бланнинг 2010 йилда Франция миллий жамоаси бош мураббийлигига келган даврга бориб тақалади.
Ўша даврдаги суратларда Самир Насрининг Жеймс Дин тасвири туширилган футболка ва иккита Louis Vuitton сумкаси билан, Лоик Реми камарли икки қатор тугмали плащда, Флоран Малуданинг эса чарм куртка ва Chrome Hearts бош кийимида Клерфонтенга келганини кўриш мумкин.
Улар камералар қаршисида жилмайиб, қўл силкишарди. Футболчилар қисқа вақтга бўлса-да, машғулот ёки ўйин либосларида эмас, балки ҳашаматли брендлар кийимларида намоён бўлишарди.
Улар бу анъананинг дастлабки вакиллари бўлди. Шундан кейин Франция миллий жамоаси футболчиларининг йиғинга келиш суратлари халқаро футбол тақвимининг мунтазам ва кўп муҳокама қилинадиган воқеаларидан бирига айланди.
«Футболчилар тобора кўпроқ таъсир ўтказувчи шахсларга айланмоқда»
Вақт ўтиши билан футболчиларнинг йиғинга келишини суратга олиш учун нафақат газета ва спорт нашрлари, балки энг йирик мода журналлари ҳам аккредитация олишга ҳаракат қила бошлади.
«Бу биз учун жуда муҳим лаҳза. Бу яхши самара бермоқда, чунки футболчилар оммавий маданиятда танилган шахслардир», — деган GQ France журнали услуб бўлими раҳбари Адриен Коммюнье Fashion Network нашрига берган интервьюсида.
Париждаги Palais Galliera музейининг «Fashion in Motion» кўргазмаси куратори Мари-Лор Гюттон эса футболчиларнинг жамиятга таъсири тобора кучайиб бораётганини таъкидлаган.
«Футболчилар тобора кўпроқ таъсир ўтказувчи шахсларга айланмоқда. Улар киядиган ҳашаматли либослар уларни томоша қиладиган барча инсонлар учун ҳамёнбоп бўлмаслиги мумкин. Аммо бундай футболчилар одамларга илҳом бериши ва уларни бошқача кийинишга, нархи нисбатан арзонроқ брендларнинг ўхшаш маҳсулотларини танлашга ундаши мумкин», — деган Гюттон.
«Барселона» ва Франция миллий жамоаси ҳимоячиси Жюль Кунде эса бу жараёндан завқ олишини яширмаган.
«Бу жуда катта шов-шув уйғотмоқда. Мен буни ижтимоий тармоқларда кўраман, ҳатто асосий оммавий ахборот воситалари ҳам бунга эътибор қаратмоқда. Бу яхши. Футболчилар ўртасида ҳам дўстона рақобат бор. Мен бундан завқланаман, кийимларимда ўзимни яхши ҳис қиламан», — деган Кунде.
Ғалати образлардан ноодатий услубларгача
Зиданнинг тақиқи Клерфонтен автотураргоҳида йиллар давомида намойиш этилган энг яхши ва энг ноодатий образларни ёдга олиш учун айни муддао.
Албатта, 2010-йилларнинг бошидан буён мода олами анча ўзгарди. Бугунги нуқтаи назардан қараганда, ўша даврда футболчилар танлаган айрим кийимлар унчалик ҳам муваффақиятли кўринмайди.
Шунга қарамай, сўнгги йилларда айрим футболчилар ўз кийиниш услубига жиддий ёндашиб, буни ижодий майдонга айлантиришди. Натижада чиройли образлар билан бирга, нотўғри танловлари сабаб эътиборга тушган ҳолатлар ҳам кўп бўлди.
Кунденинг Клерфонтенга келиши ҳар бир халқаро танаффусда алоҳида қизиқиш билан кутиларди.
2024 йил март ойида у ноодатий образда пайдо бўлди: сариқ рангдаги бош кийим ва «fleece» устидан «Louis Vuitton»нинг бир хил услубдаги жинси курткаси ва шимини кийган. Унинг образини жуда ноодатий «Ugg Moon Boots» этиклари тўлдириб турарди.
Кейинроқ ўша йили Кунде ўзини оқлади, дейиш мумкин. У GQ журналида алоҳида мақолага сабаб бўлган образда кўриниш берди. Журнал бу услубни «Парижча, замонавий блоккор услубидаги образ» дея таърифлади. Унда «vintage adidas» Франция миллий жамоаси спорт курткаси, кенг қора шим ва «Copa Mundial» кроссовкалари бор эди.
«Ливерпуль» собиқ футболчиси Ибраима Конате ҳам миллий жамоа йиғинига келганда ўзига хос кийинишни ёқтирадиган француз футболчиларидан.
Марказий ҳимоячи 2024 йил октябрида машинасидан «Kenzo» костюмида тушиб келганида ижтимоий тармоқларда тезда тарқалди. Костюм устидан у юзини тўлиқ ёпиб турган яшил рангдаги ноодатий тўрли худини кийган эди.
Кейинчалик Конате ҳазиллашиб, Кунде билан рақобатлашишга ҳаракат қилганини айтди.
Кийимлар ортиқча чалғитувчи омилга айландими?
Футболчиларнинг ноодатий кийимларидан ташқари, уларнинг ниҳоятда қиммат экани ҳам Зидан нима сабабдан Клерфонтендаги медиа шов-шувига чек қўйганини тушунтириши мумкин.
Франциянинг @clothes.rap ижтимоий тармоқ саҳифаси 2024 йилдан буён футболчиларнинг кийимларини таҳлил қилиб, уларнинг умумий қийматини ҳисоблаб келмоқда.
Кўпинча футболчиларнинг кийимлари ўн минглаб еврога баҳоланади. Қимматбаҳо соатлар ҳам қўшилганда, умумий қиймат ҳатто юз минглаб еврога етади.
Масалан, Кунденинг 2024 йилдаги «блоккор» услубидаги образи соатсиз 11 660 евро деб баҳоланган.
2025 йил сентябрида эса унинг Клерфонтенга келиш образининг бир қисми 160 минг евролик «Audemars Piguet» соати бўлган.
Футболчилар оддийроқ кийинишга ҳаракат қилганда ҳам харажатлар жуда катта бўлиши мумкин.
Килиан Мбаппенинг ўтган йилги образларидан бири Dior кўйлаги ва шимлари, Dior футболкаси, Nike кроссовкалари ҳамда Hublot соатидан иборат бўлган. Унинг умумий қиймати 50 минг евродан ошган.
Бенжамен Паварнинг 2025 йил март ойидаги «Bottega Veneta» кийимлари эса соатсиз 11 690 евро деб баҳоланган.
Бундай астрономик суммалар Зидан нима учун футболчиларнинг Клерфонтенга келишини камералар қаршисидаги шоуга айлантиришни истамаётганини маълум даражада тушунтиради.
Клерфонтендаги «мода намойиши» тарихга айланди
Зиданнинг қарори мантиқан тушунарли. Мураббий Франция миллий жамоасидаги асосий эътибор футбол, машғулот ва натижаларга қаратилишини истамоқда.
Энди футболчиларнинг Клерфонтенга келиши аввалгидек оммавий ахборот воситаларининг катта шоуига айланмайди. Бироқ бу футболчилар ўз услубидан бутунлай воз кечади дегани эмас. Улар истаса, миллий жамоанинг ички медиа лойиҳалари доирасида ўз образларини намойиш этишда давом этишлари мумкин.
Шундай қилиб, Франция миллий жамоасининг Клерфонтендаги машҳур «мода подиуми» ўз ниҳоясига етди.
Аммо сўнгги 15 йил давомида яратилган суратлар, ноодатий образлар ва футболчилар ўртасидаги дўстона мода рақобати Франция футболи тарихидаги ўзига хос давр сифатида хотирада қолади.
Нима деб ўйлайсиз, Зидан тўғри иш қилдими? Ўзбекистон миллий жамоаси футболчилари ҳам турли хил мода кийимларида келишса қизиқроқ бўлармиди ёки бу ҳолат миллий жамоа машғулотларига салбий таъсир кўрсатган бўлармиди? Фикрингизни изоҳларда қолдиринг.
