«Манчестер Сити» Родри бўйича «Реал»га қатъий шарт қўйди
«Манчестер Сити» Родри бўйича “Реал”га қатъий шарт қўйди
«Манчестер Сити» ярим ҳимоячи Родри трансфери борасида «Реал» билан музокараларда ўз позициясидан чекинмоқчи эмас. Инглиз клуби футболчини сотишга мажбур эмас ва келишув фақат ўз талабларига мос таклиф бўлсагина амалга ошишини билдирган.
Каталониянинг Sport нашри хабарига кўра, «Реал» Родри трансфери Диоманд келишуви каби осон кечади, деб ҳисоблаган. Бироқ ҳар икки йўналишда ҳам Мадрид клуби жиддий қийинчиликларга дуч келмоқда.
Манбага кўра, «Манчестер Сити» музокара стратегиясини жуда аниқ олиб бормоқда. Клуб футболчи учун белгиланган нархни пасайтирмоқчи эмас.
Инглиз клуби Родрини сотишга мажбур эмас. Ҳатто футболчи 2027-йилда эркин агент сифатида кетиши мумкин бўлса ҳам, «Сити» уни ҳозир арзон нархда қўйиб юборишни истамаяпти. Клуб ярим ҳимоячи учун бонуслар билан бирга 70 миллион евро талаб қилмоқда ва бу суммадан чекиниш ниятида эмас.
«Сити» аввал ҳам шундай йўл тутган
Sport нашри ёзишича, «Манчестер Сити»нинг футболчиларни сотишдаги сиёсат доим аниқ бўлган: клуб кетишни истаган футболчига тўсқинлик қилмайди, аммо фақат молиявий таклиф жамоани қониқтирган тақдирдагина трансферга розилик беради.
«Барселона» аввалроқ Эрик Гарсия трансферида айнан шундай вазиятга дуч келган эди. Каталония клуби футболчини дарҳол сотиб ола олмаган ва охир-оқибат унинг эркин агент сифатида кетишини кутишга мажбур бўлган. Шунингдек, «Барселона»нинг Бернарду Силвани қўлга киритиш бўйича бир нечта уринишлари ҳам рад этилган.
Родри кетишни сўраган
Манбага кўра, Родри «Манчестер Сити»дан кетиш истагини аллақачон билдирган. Энди у «Реал» инглиз клубининг молиявий талабларини бажаришини кутмоқда. «Сити» эса «Олтин тўп» соҳиби учун сўралаётган суммани адолатли деб ҳисобламоқда.
Мадрид клуби раҳбарияти дастлаб трансфер 48 соат ичида ҳал бўлади, деб ўйлаган. Аммо ҳозир «Реал» музокаралар кўпроқ вақт олишини ва келишув кутилганидек осон якунланмаслигини тушуниб турибди.
«Манчестер Сити» Буадди трансфери устида ишламоқда
Шу билан бир вақтда «Манчестер Сити» Марокаш терма жамоаси ярим ҳимоячиси Айюб Буадди трансфери бўйича ҳам ҳаракат қилмоқда. «Лилл» футболчиси 2026-йилги Жаҳон чемпионатининг кашфиётларидан бири сифатида кўрилмоқда.
Ҳозирча якуний келишув йўқ, бироқ футболчи яқин ҳафталарда «Манчестер Сити» билан шартнома имзолаши мумкин. Унинг келиши Родрининг кетишини англатмайди. Бу трансфер кўпроқ Матео Ковачичнинг жамоани тарк этиши билан боғлиқ бўлиши мумкин, чунки у бош мураббий Энсо Мареска режаларидан ўрин олмаган.
Sport нашри таъкидлашича, Родри «Реал» билан тўлиқ келишувга эришган ва трансферни амалга ошириш учун қўлидан келган барча ишни қилмоқчи. Бироқ унинг «Манчестер Сити» билан алоҳида муносабатлари сабаб футболчи музокараларда эҳтиёткорлик билан ҳаракат қилмоқда.
Родри ўзининг трансфер қиймати бундан пастроқ бўлади, деб ўйлаган. Энди эса «Реал»нинг шошилинч эҳтиёжи ва «Манчестер Сити»нинг қатъий талаблари деярли тайёр кўринган келишувни мураккаблаштириб юбориши мумкин.
