Хайр, GOAT. Лионел Мессининг Аргентина сафидаги энг унутилмас 12 лаҳзаси
Лионел Месси Аргентина терма жамоасидаги фаолиятини якунлади. Афсонавий 10-рақамнинг Бенинга қарши ўтказган сўнгги учрашувидан сўнг sports24.uz унинг «Кўк ва оқлар» сафидаги энг ёрқин ва унутилмас лаҳзаларини саралади.
Лионел Месси халқаро майдон билан хайрлашди.
Буэнос-Айресдаги афсонавий «Монументал» стадионида ўтган ҳиссиётларга бой кечада Аргентина миллий жамоаси ўзининг энг буюк футболчиларидан бири билан хайрлашди. Месси Бенинга қарши ўртоқлик учрашувида миллий жамоадаги сўнгги ўйинини ўтказди.
Афсонавий футболчи бу тарихий учрашувни ҳам ўзига хос тарзда якунлади: гол урди ва яна икки голга ассист берди.
Кўпчилик Месси 2022-йилда Қатарда бўлиб ўтган Жаҳон чемпионатида Аргентина билан бош совринни қўлга киритганидан сўнг терма жамоадаги фаолиятини якунлайди, деб ўйлаганди.
Аммо у қолишга қарор қилди. Бундан футбол мухлислари фақат хурсанд бўлиши мумкин.
Месси 39 ёшида Шимолий Америкада ўтган навбатдаги Жаҳон чемпионатида ҳам вақт унга таъсир қилмаслигини намойиш этди. Таркиби аввалгидек кучли бўлмаган Аргентина миллий жамоасини финалгача олиб борган Месси турнирни 8 та гол ва 4 та ассист билан якунлади.
Энди у халқаро фаолиятига расман нуқта қўйди. Шу муносабат билан Мессининг Аргентина либосидаги энг унутилмас 12 лаҳзасини ёдга оламиз.
12. Дастлабки чиқишидаёқ катта таассурот
Месси «Барселона»даги илк тўлиқ мавсумининг сўнгги ойларини жароҳат сабаб ўтказиб юборган бўлса-да, 2006-йилги Жаҳон чемпионатида Аргентина миллий жамоаси таркибига киритилди.
Бутун дунё футбол мухлислари Германияда ўтказилаётган мундиалда ёш Месси ўзини қандай намоён қилишини интиқлик билан кутарди.
У Аргентина миллий жамоасининг Кот-д’Ивуарга қарши илк учрашувини захира ўриндиғида ўтказди. Аммо Сербия ва Черногорияга қарши иккинчи тур учрашувининг сўнгги дақиқаларида майдонга тушиб, дарҳол ўзини кўрсатди.
Бор-йўғи 16 дақиқалик ажойиб ўйин давомида Месси бир гол урди ва яна бир голга ассист берди.
Трибунада эса аргентиналик афсона Диего Марадона ёш футболчининг ҳаракатларини кузатиб турарди.
«У шунчаки яхши футболчи эмас. У ўзгача», — деганди Марадона ўша пайтда.
11. 2014-йилги гуруҳ босқичидаги ажойиб ўйин
Месси Жаҳон чемпионатидаги дебютидан кейин иккинчи голини уриш учун ҳайратланарли тарзда саккиз йил кутди.
2010-йилда Жанубий Африкада ўтган мундиал Месси ва Марадона бошчилигидаги Аргентина учун муваффақиятсиз якунланган. Жамоа чорак финалда Германияга 0:4 ҳисобида ютқазган, шундан сўнг Марадона терма жамоадаги лавозимини тарк этганди.
Шу сабабли 2014-йилда Бразилияда ўтган Жаҳон чемпионатида Месси зиммасидаги босим жуда катта эди.
У эса турнирни ажойиб бошлади.
Босния ва Герцеговинага қарши 2:1 ҳисобидаги ғалабада Месси Аргентинанинг иккинчи голини урди. Кейинги турда эса Эрон дарвозасига учрашувнинг сўнгги сонияларида ажойиб гол киритиб, жамоасига ғалаба келтирди.
Гуруҳ босқичидаги сўнгги учрашувда Нигерияга қарши яна икки бор гол урди. Улардан бири жарима зарбасидан киритилган ажойиб гол эди.
10. Фаолиятидаги 1000-ўйин
2022-йилги Жаҳон чемпионатининг Австралияга қарши нимчорак финал учрашуви Месси учун профессионал фаолиятидаги 1000-ўйин бўлди.
Табиийки, у бундай муҳим санани ажойиб ўйин билан нишонлади.
Месси жарима майдони ичидан жуда аниқ зарба билан ҳисобни очди ва Аргентина 2:1 ҳисобида ғалаба қозонди.
«Уни томоша қилишнинг ўзи ўзгача. Майдонда у гўё ҳақиқий одамга ўхшамайди, худди мум ҳайкалга ўхшайди. Унинг қанчалик кучли эканини тушуниш ва ўйинни қандай кўришини кузатиш — ақл бовар қилмас ҳолат», — деганди Австралия ярим ҳимоячиси Кеану Баккус.
9. Бразилияга қарши Месси шоуи
2012-йил июнида АҚШнинг Ист-Ратфорд шаҳрида Аргентина ва Бразилия ўртасида ўтказилган учрашув ўртоқлик мақомида бўлган бўлса-да, Месси учун ниҳоятда муҳим эди.
Чунки рақиб — Аргентинанинг азалий рақиби Бразилия эди.
Месси учта гол уриб, Аргентина 4:3 ҳисобида ғалаба қозонишига ёрдам берди.
«Бразилияни мағлуб этиш ҳар доим ёқимли. Учта голимдан жуда хурсандман», — деганди Месси учрашувдан сўнг.
Унинг дастлабки икки голи ҳам чиройли бўлган. Аммо учрашув тақдирини ҳал қилган учинчи гол алоҳида эътиборга лойиқ эди.
Месси ярим ҳимоя чизиғида тўпни қабул қилиб, олдинга интилди ва жарима майдони ташқарисидан Бразилия дарвозасининг юқори бурчагига ҳеч ким қайтара олмайдиган зарба йўллади.
«Дунёда Мессига қарши ечим топган ҳеч ким йўқ. Унга тўртта имконият бердик ва у учта гол урди. Айрим футболчиларга умуман бўш жой бериб бўлмайди», — деганди Бразилия бош мураббийи Мано Менезес.
Аргентина устози Алехандро Сабелья эса қисқа ва мазмунли фикр билдирганди:
«Лео аргентиналик эканидан омадлимиз»
8. Гвардиолни «айлантириб» ташлаган Месси
Ёшко Гвардиол 2022-йилги Жаҳон чемпионатида ўзини дунёнинг энг яхши ёш ҳимоячиларидан бири сифатида намоён қилди.
«Манчестер Сити» унинг Хорватия терма жамоаси билан мундиалда ярим финалгача етиб боришидаги ўйинидан шу қадар таассуротландики, кейинги ёзда ҳимоячи учун 77 миллион фунт тўлади.
Аммо ҳатто 20 ёшли Гвардиол ҳам Қатарда Мессига қарши чора топа олмади.
Месси аввал пенальтидан ҳисобни очди. Кейинчалик эса Гвардиолни бир неча бор алдаб, ўнг қанот бўйлаб олдинга ўтди ва Хулиан Альваресга иккинчи голни уриш учун ажойиб имконият яратиб берди.
Хорватия сардори Лука Модрич ҳам Мессининг Лусаилдаги «буюклиги»ни эътироф этди.
Гвардиол эса Месси томонидан алданганидан афсусланмаслигини айтди.
«Унга қарши ўйнаганимдан хурсандман, гарчи мағлуб бўлган бўлсак ҳам. Фарзандларимга 90 дақиқа давомида Мессини қўриқлаганимни айтишим мумкин», — деганди ҳимоячи.
7. Лусаил жанги
Аргентина ва Нидерландия ўртасидаги 2022-йилги Жаҳон чемпионати чорак финали футбол ишқибозлари хотирасида, аввало, Мессининг Науэль Молинага берган ажойиб узатмаси билан қолган.
Бу шундай пас эдики, эҳтимол бошқа ҳеч бир футболчи уни кўрмаган бўларди. Энг муҳими, Месси уни ажойиб тарзда амалга оширди.
Аммо аргентиналик мухлисларнинг катта қисми учун «Лусаил жанги» дейилганда биринчи навбатда Мессининг ўйин тугаганидан кейинги интервьюси ёдга тушади.
У Воут Вегорстга қарата:
«Сен нимага қараяпсан, аҳмоқ? Нимага қараяпсан? Кет бу ердан!» — деганди.
Кейинчалик Месси Вегорст ва Нидерландиянинг бошқа футболчилари ҳамда мураббийлар штабига нисбатан ўзини тутганидан афсусда эканини тан олди.
Учрашув давомида рекорд даражадаги 17 та сариқ карточка кўрсатилган эди.
Аммо ўша пайтда аргентиналик мухлислар Мессининг бу қизғин характерини катта завқ билан қабул қилишди.
Кўпчилик аргентиналиклар, жумладан Эрнан Креспо ҳам аввалроқ Месси Мара noнадаги «ёвузлик» ёки қаттиққўллик етишмагани сабаб сардорлик учун мос эмаслигини таъкидлаб келган эди.
Нидерландияга қарши баҳсда эса Месси ўз характерининг бошқа томонини намойиш этди.
«Ҳаммаси табиий равишда юз берди. Мен шунчаки шундай муносабат билдирдим. Ўша футболчи билан боғлиқ воқеалар ва бошқа таранг вазиятлар ҳам бўлганди. Ўйин эндигина тугаган, ҳаммаси ҳали жуда янги эди. Мен бу ҳолат билан эсда қолишни истамайман, аммо баъзида шундай воқеалар содир бўлади», — деганди Месси 2023-йилда.
6. Мисрга қарши ақл бовар қилмас камбек
2026-йилги Жаҳон чемпионатининг Мисрга қарши нимчорак финал учрашуви тугашига 11 дақиқа қолганида кўпчилик Мессининг Аргентина миллий жамоасига қайтиш қарорини муҳокама қила бошлаганди.
Аргентина 0:2 ҳисобида ортда бораётган, Месси эса биринчи бўлимда пенальтидан фойдалана олмаган эди.
Аммо у таслим бўлмади.
Месси ўнг қанотдан жарима майдонига ажойиб узатма йўллади ва Кристиан Ромеро бош билан ҳисобни қисқартирди.
Орадан атиги тўрт дақиқа ўтиб, собиқ «Барселона» ҳужумчиси қайтган тўпни кучли зарба билан дарвозага йўллаб, ҳисобни тенглаштирди.
Шу тариқа Месси Жаҳон чемпионатлари тарихида кетма-кет олтита плей-офф учрашувида гол урган илк футболчи бўлди.
Кейин Энцо Фернандес жарима вақтида Лаутаро Мартинеснинг ажойиб узатмасидан сўнг ғалаба голини урди.
Аргентина ажойиб камбекни амалга оширди. Учрашув якунида Месси, Лионель Скалони ва жамоанинг деярли барча футболчилари кўз ёшларини тия олишмади.
«Мен Лео футболни айнан шундай лаҳзалар учун ўйнашига ишонаман. Фаолиятининг ушбу босқичида у бундай ҳиссиётларни бошдан кечираётгани жуда қийин тушунтириладиган ҳолат. Бу унутилмас лаҳза, энг буюк лаҳзалардан бири», — деди Скалони.
5. «Худонинг совғаси»
Аргентина билан кетма-кет учта финалда мағлуб бўлган Месси 2016-йилги Америка Кубоги финалида Чилига пенальтилар сериясида ютқазганидан сўнг халқаро фаолиятини якунлашини эълон қилганди.
Бироқ аргентиналик мухлисларнинг уни қайтишга чақириши, ҳатто ўша пайтдаги мамлакат президенти Маурисио Макрининг Мессини «Худонинг совғаси» деб атагани натижасида ҳужумчи қарорини ўзгартирди.
Бу Аргентина учун жуда муҳим қарор бўлди.
2017-йил 10-октабрь куни Эквадорга қарши ЖЧ саралаш учрашувида Аргентина мундиалга чиқиш учун ғалаба қозониши шарт эди. Учрашувнинг дастлабки дақиқаларида Эквадор ҳисобни очди.
Аммо Месси босимга ҳам, Кито шаҳрининг баланд тоғли ҳудудидаги оғир шароитга ҳам эътибор бермади.
У хет-трик қайд этиб, деярли бир ўзи Аргентинани 2018-йилги Жаҳон чемпионатига олиб чиқди.
«Худога шукр, мақсадимизга эришдик», — деганди Месси учрашувдан сўнг.
Ўша куни бутун Аргентина Мессидан миннатдор эди.
4. 2022-йилги мундиални қайта бошлаган гол
Аргентина Қатардаги Жаҳон чемпионатига катта ишонч билан келганди. Жамоа Жанубий Америка чемпиони сифатида мундиалга етиб келган ва қаторasига 36 та ўйинда мағлуб бўлмаганди.
Аммо турнирнинг илк учрашувида Аргентина тарихдаги энг катта сенсациялардан бирига дуч келди.
Месси пенальтидан ҳисобни очган бўлса-да, Саудия Арабистони иккинчи бўлимда иккита гол уриб, 2:1 ҳисобида ғалаба қозонди.
Шундан сўнг Мексикага қарши иккинчи тур учрашуви Аргентина учун ҳал қилувчи аҳамият касб этди. Яна бир мағлубият жамоанинг гуруҳ босқичидаёқ турнирни тарк этишига олиб келиши мумкин эди.
Аммо яна Месси майдонга чиқди.
Учрашувнинг 64-дақиқасида Анхель Ди Мариянинг узоқдан берган узатмасини Месси жарима майдони ташқарисида қабул қилди ва ҳеч иккиланмай, пастдан кучли зарба йўллаб, Мексика дарвозасини ишғол қилди.
Аргентина кейинчалик 2:0 ҳисобида ғалаба қозонди.
«Бугун Аргентина учун янги Жаҳон чемпионати бошланди», — деди Месси учрашувдан сўнг.
У ҳақ эди. Аргентина энг катта шармандалик хавфидан чиқиб, якунда турнирнинг бош совринини қўлга киритди.
3. Ҳаммасини ўзгартирган ғалаба
2021-йилги Америка Кубоги финалида Месси Бразилияга қарши ўйинда ўзининг энг яхши учрашувларидан бирини ўтказмаган бўлиши мумкин.
Аммо бунинг аҳамияти йўқ эди.
Чунки Аргентина финалгача етиб келишида Месси катта роль ўйнаганди. У турнир давомида жамоанинг 12 та голининг 9 тасида бевосита иштирок этди ва 5 та гол урди.
Финалда Аргентина Бразилияни 1:0 ҳисобида мағлуб этди.
Месси гол урмаган бўлса-да, бу унинг фаолиятидаги энг муҳим ғалабалардан бири бўлди.
Чунки у ниҳоят Аргентина билан катта халқаро совринни қўлга киритди.
Финал ҳуштаги янграганида Месси Маракана майдонида кўз ёшларини тия олмади ва майсага чўкиб қолди.
«Кўп марта мендан тортиб олинган орзуга эришганим учун хотиржамман. Бу худди тушдек эди. Ажойиб лаҳза. Бу содир бўлганига ишонолмадим», — деди Месси уч ой ўтиб.
Аргентинанинг 28 йиллик Америка Кубоги чемпионлиги соғинчига нуқта қўйилиши кейинчалик янада катта аҳамият касб этди.
Анхель Ди Мариянинг ғалаба голи Аргентина футболи тарихидаги энг муваффақиятли даврнинг бошланиш нуқтасига айланди.
2. 39 ёшида Англияни таслим қилган Месси
Месси 2026-йилги Жаҳон чемпионатига келгунига қадар Марадона билан деярли барча жиҳатларда тенглашиб улгурган, айрим кўрсаткичларда эса ундан ҳам ўзиб кетганди.
Аммо унинг амалга оширмаган бир мақсади бор эди: Аргентина билан Англияни Жаҳон чемпионатида мағлуб этиш.
15-июль куни бу мақсад ҳам амалга ошди.
Учрашувнинг асосий вақти тугашига беш дақиқа қолганида Аргентина тобора ҳимояга ётиб олган Англияга қарши 0:1 ҳисобида ортда бораётган эди.
Амалдаги чемпионлар рақиб ҳимоясини ёриб ўтишда қийналишди. Ҳатто имконият топилган вазиятларда ҳам дарвоза тўсинлари Аргентина учун тўсиқ бўлди.
Аммо Аргентина бурчак тўпи орқали Англия ҳимоясини чалғитди. Месси ўзига бир нечта ҳимоячини тортиб, Энцо Фернандесга жарима майдони ташқарисидан зарба бериш учун бўш жой яратди.
Фернандес кучли зарба билан ҳисобни тенглаштирди.
Шундан кейин Англия янада чуқурроқ ҳимоялана бошлади. Аммо Месси олти метрлик жарима майдонида бир нечта икки метрлик ҳимоячилар орасидан Лаутаро Мартинесни топа олди.
Унинг аниқ узатмасидан сўнг ҳужумчи бош билан гол урди ва Аргентина финалга чиқди.
39 ёшли Месси яна бир бор икки жамоа ўртасидаги асосий фарқ бўлиб чиқди.
«Биз бу фарқни Жуд Беллингем ёки Ҳарри Кейн яратади, деб ўйлаган эдик. Аммо у — шунинг учун ҳам қирол, барча даврларнинг энг буюк футболчиси. Унинг қилаётганлари ақл бовар қилмас даражада», — деди Мика Ричардс BBC эфирида.
Мессининг мундиалдаги қаҳрамонликлари унинг оиласидаги оғир вазият фонида янада таъсирли бўлди.
Унинг отаси Хорхе турнир вақтида оғир касал эди ва Аргентина Испанияга финалда мағлуб бўлганидан кўп ўтмай вафот этди.
Месси отасига бағишлаган очиқ мактубида шундай ёзди:
«Ҳар бир ўйин тугагач, сендан келадиган хабарни кутардим ва уни соғинардим. Ўшанда вазият қанчалик жиддий эканини тушундим. Шунга қарамай, имкон қадар узоққа бориш ҳақида ўйлашда давом этдим. Сенга вақт бериш ва ўйинни томоша қилишинг учун имконият яратишни хоҳлардим. Уни ютиб, совринни сенга олиб боришни ва янгисини кўрсатишни истагандим. Аммо уддалай олмадим. Оёқларим бошқа бора олмади. Бу сафар танамга қарши курашишга ҳаракат қилдим, аммо уддалай олмадим»
Аргентина финалгача етиб келганининг ўзи ҳам Мессининг буюклигини яна бир бор намойиш этди.
1. Тақдир амалга ошди
Месси фаолиятининг энг буюк лаҳзаси.
Жаҳон чемпионати тарихидаги энг драматик финаллардан бирида Аргентина Франция билан 3:3 ҳисобида дуранг ўйнади. Пенальтилар сериясида эса Гонсало Монтиэль ҳал қилувчи зарбани аниқ амалга оширди.
Шу лаҳза билан Месси футбол тарихидаги энг буюк футболчи мақомини янада мустаҳкамлади.
1986-йилда Диего Марадонанинг кейин ҳеч бир футболчи Жаҳон чемпионатида Мессидай устунлик билан ўйнай олмаган эди.
Месси Қатардаги мундиалнинг ўзи иштирок этган ҳар бир плей-офф учрашувида «Энг яхши футболчи» совринини қўлга киритди.
Финалдаги икки голи унинг Жаҳон чемпионатларидаги умумий гол ва голли узатмалар сонини 21 тага етказди. Бу кўрсаткич билан у Бразилия афсонаси Пеле рекордини ҳам ортда қолдирди.
Месси, шунингдек, Жаҳон чемпионатининг «Олтин тўп»ини икки марта қўлга киритган тарихдаги ягона футболчига айланди.
Энг ҳайратланарлиси эса — у буларнинг барчасини 35 ёшида амалга оширди.
Бу ҳатто Марадонда ҳам кузатилмаган даражадаги узоқ йиллар давом этган юқори савиянинг ёрқин исботи эди.
«Лионел Мессини қарийб йигирма йил давомида кузатиш мен учун катта шараф бўлди. Бири-кетин сеҳрли, ҳайратланарли ва завқ бағишловчи футбол лаҳзалари. У футбол худоларининг бизга берган совғаси», — деб ёзганди Англия футболи афсонаси Линекер.
Энди эса Месси Аргентина миллий жамоаси билан хайрлашди. Унинг мероси эса нафақат қўлга киритилган совринлар, балки мағлубиятлардан кейин қайта туриш, босим остида жамоани ортидан эргаштириш ва миллионлаб мухлисларга унутилмас лаҳзалар тақдим этиш қобилияти билан ҳам ўлчанади.
