Жалолов Британия юлдузига қарши рингга чиқадими?
Boxingnews24 нашри муаллифи Баҳодир Жалоловни британиялик машҳур боксиёр Мозес Итаума учун муносиб рақиб сифатида тилга олди. 19 июл куни рингга қайтиши кутилган Итауманинг рақиби яқин кунларда эълон қилинади.
Boxingnews24.com сайти журналисти Дэниэл Макглинчи ютқазмаган супертяжеловес Мозес Итаума (20–0, 10 КО) фаолияти ҳақида фикр билдириб, унинг даражасини аниқлаш учун кучли рақиблар билан жанг қилиш зарурлигини таъкидлади. Унингча, ўзбекистонлик Баҳодир Жалолов (15–0, 14 КО) айнан шундай рақиблардан бири ҳисобланади.
«Идеалда Мозесни юқори даражадаги рақибларга қарши чиқариш керак. Ана ўшанда у ҳақиқатан ҳам “999 пробали олтин” эканини исботлайди. Агар унда камчиликлар аниқланса, демак, у қалбаки — ва бундайларни кўчга ташлаш мумкин», — деб ёзади Макглинчи.
Муаллиф Итаумага эҳтимолий рақиблар сифатида қуйидаги номларни келтиради:
• Жозеф Паркер
• Ричард Торрес-кичик
• Баҳодир Жалолов
• Дайниер Перо
• Филип Хргович
• Мартин Баколе
• Чжан Чжилей
• Эфе Аджагба
• Энди Руис
• Жаред Андерсон
Итауманинг жамоаси ҳозирча аниқ рақиб номи бўйича маълумот бермаган. Бироқ 19 ёшли боксиёрнинг навбатдаги жангини сабрсизлик билан кутувчилар сони ортиб бормоқда, айниқса, у дуэлда Жалолов каби мағлубиятсиз рақибга қарши рингга чиқса.
