Японияда икки боксчининг ҳалок бўлиши спорт дунёсини ларзага солди
Япония бокс жамоатчилигини чуқур қайғуга солган дахшатли воқеа юз берди — Токиода ўтказилган турнирдa икки профессионал боксчи ҳаёт билан видолашди. Бу ҳақда Жаҳон бокс ташкилоти (WBO) расмий баёнот берди.
2 август куни 29 ёшли Хирумаса Уракава саккизинчи раундда ватандоши Едзи Саитога қарши жангда техник нокаут билан мағлубиятга учради. Жанг давомида бошидан оғир жароҳат олган Уракава шифохонага олиб кетилди. Шифокорлар унинг ҳаётини сақлаб қолиш учун краниотомия операциясини ўтказишди, бироқ бош мия ички қон кетиши оқибатида спортчи 9 август куни вафот этди.
WBO ўз баёнотида марҳумнинг оиласи, яқинлари ва Япония бокс ҳамжамиятига чуқур таъзия изҳор этди.
Шу турнирда 28 ёшли Шигетоси Котари ҳам оғир жароҳат олди. У Шарқий ва Тинч океани бокс федерациясининг иккинчи енгил вазн чемпионлик камари учун Ямато Хатага қарши 12 раундлик жангда иштирок этди. Дуранг қайд этилди, Хата унвонини сақлаб қолди. Бироқ беллашувдан сўнг Котари шифохонага ётқизилиб, жарроҳлик амалиёти ўтказилди, аммо бир неча кундан сўнг у ҳам ҳаётдан кўз юмди.
Бу воқеалар Японияда боксда хавфсизлик талаблари кучайтирилиши масаласини янада долзарб қилди. Мутасаддилар жангчилар саломатлигини муҳофаза қилиш учун жанглардан олдин ва кейин тиббий назоратни янада кучайтириш зарурлигини таъкидламоқда.
