World Boxing кубоги: Остонада ҳал қилувчи босқичлар бошланди
Остона шаҳрида ўтаётган World Boxing кубоги жадал суръатда давом этмоқда. Бугун, 3 июл — мусобақанинг тўртинчи куни. Кеча бир қатор йирик жанглар ўтказилган бўлса, энди эса навбат чорак финал баҳсларига етди. Турнир янада қизғин ва принципиал тус ола бошлади.
Бугунги кун дастуридан фақатгина битта ўзбекистонлик боксчи рингга чиқади. -54 кг вазн тоифасида иштирок этаётган Феруза Казакова чорак финалда Хитой Тайпейи вакиласи — тажрибали спортчи Хуанг Хсиао-Венга қарши жанг қилади. Ушбу беллашув соат 14:00 да бошланиши белгиланган.
Казакова учун бу жуда муҳим жанг — ғалаба унга ярим финалга йўл очади ва медаллар учун курашиш имконини беради. Эътиборлиси, Феруза мусобақанинг илк кунлариданоқ ўзининг кучли тайёргарлиги ва жангдаги илинжини намоён қилган эди.
Шуни ҳам таъкидлаш керакки, World Boxing кубоги нафақат чемпионлик унвонлари, балки рейтинг очколари ва келажакдаги йирик турнирларда иштирок этиш имкониятлари нуқтаи назаридан ҳам катта аҳамиятга эга. Шу боис ҳар бир ғалаба, ҳар бир раунд ўта муҳим аҳамият касб этади.
Боксчиларимизга омад тилаймиз ва мухлислардан катта қўллаб-қувватлашни кутамиз!
