World Boxing аёллар учун янги қоидаларни жорий этди
World Boxing ташкилоти ўз турнирлари учун янги тартибларни эълон қилди. 20 августдан кучга кирган қоидага кўра, аёл спортчилар рингга чиқишдан олдин генетик тестдан ўтиб, туғилганда белгиланган жинсини тасдиқловчи сертификат тақдим этишлари керак.
Ушбу талаб биринчи марта 4–14 сентябр кунлари Ливерпулда бўлиб ўтадиган жаҳон чемпионатида қўлланилади. Текширув барча ўнта аёллар вазн тоифаси учун мажбурий ҳисобланади.
Тест бир маротаба амалга оширилади ва у спортчида Y-хромосоманинг мавжуд ёки мавжуд эмаслигини аниқлаб беради. Миллий федерациялар боксчиларнинг биологик жинсини тасдиқловчи ҳужжатни тақдим этиши шарт, акс ҳолда спортчи мусобақага қўйилмайди.
World Boxing президенти Борис ван дер Ворстнинг таъкидлашича, янги қоида жангларда хавфсизлик ва адолатни таъминлашга қаратилган. Унинг фикрича, айниқса аёллар мусобақаларида бу масала ўта долзарб ҳисобланади.
