WBO Александр Усикнинг навбатдаги жангини расман эълон қилди
Халқаро бокс ташкилоти (WBO) президенти Густаво Оливери бу маълумотни расман тасдиқлади.
Украиналик учта асосий йўналиш чемпиони Александр Усик IBF камари соҳиби британлик Дэниел Дюбуага қарши яна мутлақ жаҳон чемпионлиги учун рингга кўтарилади.
“Бизнинг ташкилотга Усик ва Дюбуа ўртасидаги бирлаштирувчи чемпионлик жанги юзасидан сўровнома келиб тушди. Биз бу жанг ўтказилишини қаноатлантирамиз. Қолаверса, Жозеф Паркер мақомини ҳам кўриб чиқамиз”, — дея Оливерининг сўзларини келтирмоқда Sky Sports портали.
Эслатиб ўтамиз, Усик сўнгги жанги 22-декабр куни Ар-Риёд (Саудия Арабистони) шаҳрида британлик Тайсон Фьюрига қарши ўтказиб, очколар ҳисобига кўра ғалаба қозонганди.
Дюбуа эса 22-феврал куни Жозеф Паркердан камарини ҳимоя қилиши керак эди. Аммо жангга икки кун қолганида Паркер бетоб бўлиб қолган ва унинг ўрнини қисқа фурсатда африкалик Мартин Баколе эгаллаганди.
