WBA Жервонта Дэвисга «таътилдаги чемпион» мақомини берди
Жаҳон бокс ассотсиасияси (WBA) уч вазн тоифасида жаҳон чемпиони бўлган, мағлубиятсиз америкалик Жервонта Дэвисга «champion in recess» (таътилдаги чемпион) мақомини берди. Бу ҳақда BoxingScene нашри хабар қилди.
Мазкур қарор Флорида штатида Дэвисга нисбатан очилган янги жиноий иш билан боғлиқ. У собиқ севгилисини калтаклаш, ноқонуний равишда эркинликдан маҳрум этиш ва ўғирлаб кетишга уринишда айбланмоқда. Ушбу айбловлар 2025 йил ноябрь ойига режалаштирилган Жейк Полга қарши тижорий жангнинг бекор қилинишига ҳам сабаб бўлган.
WBA президенти Хильберто Мендоса боксчининг янги мақомини тасдиқлади. Бу эса амалда Дэвиснинг тўрт йиллик чемпионлик ҳукмронлиги якунланганини англатади. Ассоциация ижрокўми яқин орада бўшаб қолган чемпионлик камарини қандай тартибда ўйнаб бериш масаласини ҳал қилади. Энг асосий даъвогарлар сифатида рейтингда юқори ўринларни эгаллаб турган Флойд Скофилд ва Лукас Бахди кўрилмоқда.
«Танк» лақабли Дэвис ўз позициясини билдириш ҳуқуқига эга, айниқса унинг ҳуқуқий ҳолати аниқлашиб бораётган бир пайтда. У охирги бор 2025 йил март ойида рингга чиққан ва ўшанда Ламонт Роучга қарши жангни дуранг билан якунлаган.
