WBA Континентал камари соҳиби Руслан Абдуллаев Ўзбекистонга қайтди
Супер енгил вазн тоифасидаги профессионал боксчимиз Руслан Абдуллаев якшанба тонггида АҚШнинг Калифорния штати Оушенсайд шаҳрида ташкил этилган проф бокс оқшомида филлипинлик Жино Родригони саккиз раунд тўлиқ давом этган жангда ҳакамларнинг якдил қарори билан (80:71, 80:71, 80:71) мағлубиятга учратганди.
Ҳамюртимиз бугун Ўзбекистонга қайтиб келди ва тантанали равишда кутиб олинди.
Абдуллаевни Ислом Каримов номидаги Тошкент халқаро аэропортида Спорт вазирининг ўринбосари Шаҳрулло Маҳмудов, МОҚ Бош котиби Ойбек Қосимов, мамлакат бокс федерацияси Бош котиби Шоҳид Тиллабойев ва унинг яқинлари муносиб қарши олди.
Расмийлар спортчимизнинг профессионал боксдаги иккинчи муваффақияти билан қутлаб, унинг кейинги фаолиятида ҳам ёрқин ғалабалар тилашди.
Эътиборлиси шундаки, Оскар Де Ла Ҳойяга тегишли Голден Бой промоутерлик компанияси мижози бўлган Руслан Абдуллаев проф боксдаги иккинчи жангидаёқ WBA Континентал камарини қўлга киритди.
