Венгрияда ўзбекистонлик боксчи Шоҳжахон Абдуллаев иштирокида бокс кечаси бўлиб ўтади
9 май куни Будапешт шаҳрида (Венгрия) профессионал бокс кечаси ташкил этилади. Тадбирнинг асосий жангида машҳур британ боксира Томми Фюри Босния ва Герцеговина вакили Кенан Ханялисга қарши рингга чиқади.
Қизиқарлиси шундаки, ушбу кечада Ўзбекистондан бўлган 22 ёшли профессионал боксчи Шоҳжахон Абдуллаев ҳам жанг ўтказади. Унинг рақиби Грузия вакили Ираклий Аланидзе (6–5–1) бўлади. Шунингдек, Абдуллаев 26 апрел куни ҳам жанг ўтказиши кутилмоқда — бу сафар у Венесуэла боксчиси Иван Матют (31–20–2)га қарши рингга чиқади. Ушбу жанг ҳам Будапештда ўтказилади ва Шоҳжахон учун Венгриядаги илк жанг бўлади.
Маълумот учун: Шоҳжахон Абдуллаев шу вақтгача 3 та профессионал жанг ўтказиб, барчасида ғалаба қозонган. Олдинда уни икки ҳафта ичида яна 2 та жанг кутмоқда.
