Теренс Кроуфорд Тайсон ва Пол ўртасидаги жангни уюштирилган деб атади
Америкалик машҳур боксчи Теренс Кроуфорд афсонавий Майк Тайсон ва блогер Жейк Пол ўртасидаги қарама-қаршиликнинг ҳаққонийлигига шубҳа билдирди. Кроуфорднинг фикрича, рингда содир бўлган воқеалар ҳақиқий жангдан кўра кўпроқ олдиндан келишилган томошани эслатган.
Жо Роган подкастида сўзга чиққан Кроуфорд ўз фикрларини қуйидагича баён қилди:
«Афсонанинг бундай ҳолатда кетаётганини кўриш юракни эзади. У умуман рингга чиқмаслиги керак эди. Мен Тайсоннинг ўз қўлқопларини бунчалик тишлаганини ҳеч қачон кўрмаганман — у рақибига зарба бермаслик учун қўлидан келган барча ишни қилди. Ўйлайманки, бу жанг келишилган эди. Унинг обрў-эътиборини ҳисобга олиб, пул ишлашнинг бошқа йўлини топишса бўларди. Жейк Полнинг ушбу чиқишидан сўнг айтишим мумкинки, у ҳатто Мейвезерга ҳам бирорта зарба йўллай олмайди».
Эслатиб ўтамиз, Тайсон ва Пол ўртасидаги шов-шувли жанг 2024 йилнинг ноябрь ойида бўлиб ўтган эди. Саккиз раунд давом этган баҳс якунида ҳакамларнинг якдил қарори билан Жейк Пол ғолиб деб топилганди.
