Тайсон Фьюри — Энтони Джошуа жанги декабрда Кардиффда ўтказилиши мумкин
Оғир вазннинг икки юлдузи — Тайсон Фьюри ва Энтони Джошуа ўртасидаги узоқ кутилган жанг 2026-йил декабр ойида Кардиффда бўлиб ўтиши мумкин. Ҳозирча 11-декабр асосий сана сифатида кўриб чиқилмоқда, бироқ жанг тафсилотлари тўлиқ якунланмаган. Бу ҳақда The Athletic маълумотига таяниб Reuters хабар бермоқда.
Манбага кўра, асосий вариант сифатида Кардиффдаги қарийб 74 минг томошабинга мўлжалланган “Principality Stadium” кўрилмоқда. Аввалроқ Нью-Йорк, Лас-Вегас ва Дублин ҳам эҳтимолий мезбон шаҳарлар қаторида тилга олинган, бироқ Джошуа жанг Буюк Британияда ўтказилишини истаган. Фьюри томони ҳам энди Британиядаги вариантга рози бўлгани айтилмоқда.
Жанг Netflix орқали намойиш этилиши кутилмоқда. Ташкилотчилар АҚШ аудиторияси учун қулай вақтни танлаш мақсадида асосий жангни Британия вақти билан жуда кеч бошлаш вариантини ҳам муҳокама қилмоқда. “Principality Stadium”нинг ёпиладиган томи ва кечки тадбирларни ўтказиш имконияти Кардифф вариантини янада қулай қилмоқда.
Маълумот учун, Фьюри ва Джошуа ўртасидаги жанг кўп йиллардан бери муҳокама қилиниб келмоқда. Фьюрининг менеджери Спенсер Браун сентябр ойида ушбу тўқнашув амалга ошишига ишончи комил эканини билдирган, бироқ жанг санаси ва аренаси бўйича расмий эълон ҳозирча берилмаган.
