Шоҳжаҳон Эргашев октябр ойида Британияда жанг қилади
Профессионал бокснинг супер енгил вазн тоифасида собиқ чемпионлик даъвогари Шоҳжаҳон Эргашев ўз режалари билан ўртоқлашди. Унинг айтишича, ҳозирда асосий эътиборини Ўзбекистонда промоутерлик асосида ўтказилаётган бокс кечаларига қаратган.
«Фарғона, Самарқанд ва Наманганда турнирлар ўтказдик. Навбатдагисини сентябрда Жиззах ёки Бухорода ташкил қилишни режалаштиряпмиз. Шу орқали бир неча ёш боксчиларни танлаб олдик ва уларга хорижда жанг уюштирмоқчимиз. Мeнгa ҳам жанг таклифи келди — октябр ойида Британияда рингга чиқаман. Яқин кунларда Россия ёки АҚШда йиғин бошлайман», — деди Эргашев.
BoxRec маълумотига кўра, октябр ойида Британиянинг Бирмингем, Саутгемптон, Манчестер, Глазго, Лидс ва бир қатор шаҳарларида турнирлар режалаштирилган.
Маълумот учун, 33 ёшли Эргашев ҳозиргача 27 та жанг ўтказган, улардан 25 тасида ғалаба қозонган ва 2 марта мағлубиятга учраган.
