Шаҳрам Ғиёсов: Эннис — Станёнисга нисбатан хавфлироқ, унга тайёргарлик кўриш қийинроқ, чунки у тахмин қилиб бўлмайди
WBA версияси бўйича ярим ўрта вазнда жаҳон чемпионлигига даъвогар Шаҳрам Ғиёсов эҳтимолий рақиблари — Жейрон Эннис ва Эймантас Станёнис ҳақида фикр билдирди.
«Албатта, Эннис жуда кучли жангчи. У универсал, муайян услуби йўқ — ўзи хоҳлаганча жанг қилади. Шу боис унга қарши тайёргарлик кўриш анча мураккаб, чунки ундан нима кутишни билмайсан. Станёнис эса анча оддий ва прогноз қилинадиган боксчи: у қандай ҳаракат қилишини тушуниш осонроқ ва унга қарши аниқ режа тузиш мумкин. Шунинг учун Эймантасга қарши тайёргарлик кўриш Энниска нисбатан енгилроқ», — деди Ғиёсов интервюда.
Эслатиб ўтамиз, Жейрон Эннис апрел ойидаги жангда Станёнисни олтинчи раундда техник нокаут билан мағлуб этганди. WBA бу икки боксчи ўртасида чемпионликни бирлаштирувчи жангни тайинлаб, жамоаларга музокаралар учун 30 кун муҳлат берган.
