Шахрам Ғиёсов тарихий жанг олдидан тайёргарликни якунлади
Ўзбекистонлик профессионал боксчи Шахрам Ғиёсов (17-0, 10 KO) Мисрда бўлиб ўтадиган нуфузли «Glory in Giza» бокс оқшоми олдидан тайёргарликни якунлади. Ҳамюртимиз 23 май куни тарихий эҳромлар ёнида британлик тажрибали Жек Кеттероллга (32-2, 14 KO) қарши WBA Regular чемпионлик камари учун рингга кўтарилади.
Ғиёсов машғулотларни Туркияда, таниқли мураббий Геннадий Машянов қўл остида ўтказди ва жангга ҳар томонлама тайёр эканлигини билдирди. «Мақсадимиз битта — чемпионлик камарини қўлга киритиб, Ватанимизга олиб келиш», — дея ижтимоий тармоқлар орқали мухлислардан дуо қилиб туришларини сўради спортчимиз. Рақиб Жек Кеттерол эса Шахрамнинг услубини чуқур ўрганганини ва унга асло паст баҳо бермаслигини таъкидлади.
«The Ring» ва «DAZN» ҳамкорлигида ташкил этилаётган ушбу йирик турнирнинг марказий жангида оғир вазн тоифаси юлдузи Александр Усик ҳам иштирок этади. Шахрам Ғиёсов учун ушбу ғалаба жаҳон рейтингида мутлақ етакчилар қаторига кириш ва янада йирик титул жангларига йўл очиш имкониятини беради.
