Себастиан Фундора барча чемпионлик камарларини бирлаштириш ниятида
WBC йўналишида биринчи ўрта вазн чемпиони Себастиан Фундора дивизиондаги барча асосий чемпионлик камарларини бирлаштиришни мақсад қилганини маълум қилди. Америкалик боксчи келажакда Жарон Эннисга қарши катта жанг ўтказиш истагини билдирди. Бу ҳақда Фундоранинг матбуот вакиллари билан суҳбатига таяниб, Bad Left Hook нашри хабар бермоқда.
Манбага кўра, Фундора аввало 17 октябрь куни мағлубиятга учрамаган албаниялик Эрмал Хадрибеайга қарши ўз чемпионлик камарини ҳимоя қилади. Шундан кейин у Эннис ва Жош Келли ўртасидаги жанг ғолиби билан тўқнашиш имкониятини кўриб чиқмоқчи.
Фундора Эннисга қарши баҳсни вазн тоифасидаги энг қизиқарли тўқнашувлардан бири деб ҳисоблайди. Америкалик спортчининг фикрича, мазкур жанг ташкил этилса, дивизиондаги энг кучли боксчини аниқлаш учун катта имконият юзага келади.
Маълумот учун, 28 ёшли Фундора профессионал фаолиятида 24 та ғалаба, битта мағлубият ва битта дуранг қайд этган. У 2024 йилда Тим Цзюни мағлуб этиб, WBC чемпионлик камарини қўлга киритган. Ҳозирча Эннисга қарши жанг бўйича расмий келишув мавжуд эмас.
