Расман: Тайсон Фьюри ва Энтони Жошуа 11-декабрь куни Кардиффда жанг қилади
Оғир вазн тоифасининг икки йирик британлик вакили — Тайсон Фьюри ва Энтони Жошуа ўртасидаги узоқ кутилган жанг расман тасдиқланди. Қарама-қаршилик 11-декабрь куни Уэльснинг Кардифф шаҳридаги “Principality Stadium” аренасида бўлиб ўтади. Бу ҳақда Netflix расман маълум қилди.
Жанг Netflix орқали бутун дунё бўйлаб жонли намойиш этилади. Фьюри ва Жошуа шу кунгача профессионал рингда бир-бирига қарши жанг қилмаган, шу сабаб бу учрашув икки британлик оғир вазн юлдузининг илк тўқнашуви бўлади.
Ҳозирда Фьюрининг профессионал рекорди 36 ғалаба, 2 мағлубият ва 1 дуранг, шундан 25 таси нокаут билан якунланган. Жошуа эса 34 жангнинг 30 тасида ғалаба қозонган ва 27 та нокаут қайд этган. Иккала боксчи ҳам ёздаги тайёргарлик жангларида ғалаба қозониб, ушбу катта қарама-қаршиликка йўл очган.
Маълумот учун, Фьюри ва Жошуа ўртасидаги жангни ташкил этиш бўйича музокаралар бир неча йил давом этган ва аввалги уринишлар турли сабабларга кўра амалга ошмай қолган эди. Жанг олдидан икки боксчи 30-сентябрь куни Лондонда матбуот анжуманида юзма-юз учрашади.
