Қозоғистонлик журналист: Ўзбекистон боксини таназзул кутаётган бўлиши мумкин
Қозоғистонлик спорт журналисти Олжас Байбосин Yessen Yeleuken YouTube-каналига берган интервьюсида ўзбек бокси келажагига доир фикрлари билан ўртоқлашди. Унинг таъкидлашича, Олимпиада-2024даги мислсиз муваффақиятдан сўнг табиий пасайиш кузатилиши мумкин.
— 2000 йилда Мухаммадқодир Абдуллаев “олтин” олган, кейин эса 2016 йилгача Ўзбекистон боксчилари бирор марта чемпионликка эришмаган. Бу учта Олимпия циклда “қуруқ” қолиш дегани. Ўшанда уларда спортга эътибор пасайган, тизим бошқа йўналишларга қаратилган эди. Ҳаммага маълум: спортда ривож бўлиши учун маблағ ва тизим бўлиши шарт, — деди Байбосин.
Унинг фикрича, Ўзбекистон Олимпиададаги бешта олтин ортида катта тайёргарлик, тизимли ёндашув, илмий асос ва инвестициялар турибди. Бироқ у ҳар қандай юксалиш ортидан пасайиш келиши табиий жараён эканини таъкидлади.
— Замонавий спортда чемпионини заиф шароитда етиштириш мумкин эмас. Бу — кучли тизим натижаси. Биз бу босқични 2012 йилда ўтганмиз — ўша пайтда медаллар рейтингида 12-ўринни олганмиз. Улар эса бу босқични кеча ўтди. Яқин йилларда уларда ҳам пасайиш бўлиши эҳтимолдан холи эмас. Бу табиий жараён, — дея қўшимча қилди журналист.
Эслатиб ўтамиз, Париж-2024 Олимпиадасида Ўзбекистон боксчилари бешта олтин медални қўлга киритди. Чемпионлар: Баҳодир Жалолов (+92 кг), Лазизбек Мулложонов (−92 кг), Асадхўжа Муйдинхўжаев (−71 кг), Абдумалик Ҳалоқов (−57 кг) ва Ҳасанбой Дўсматов (−51 кг). Қозоғистон эса фақат бирта кумуш медал билан кифояланди — Нурбек Оралбай (−80 кг).
