Осиё чемпионати: ўзбек боксчиларининг чорак финал натижалари
22 апрел куни, Иорданиядаги мусобақанинг тўртинчи кунида, чорак финал жангларида Ўзбекистоннинг олти нафар вакили иштирок этди. Куннинг илк жангида Сармат Шокаримов Қозоғистонлик Даулет Тенелбайни 5:0 ҳисобида ишончли тарзда мағлуб этиб, 35 кг вазн тоифасида ярим финалга йўл олди. Мухриддин Ҳамиджонов ҳам навбатдаги босқичга чиқди: у 37 кг вазн тоифасида филиппинлик Ричард Пайлуни иккинчи раундда нокаутга учратди.
40 кг вазн тоифасида Камронбек Камилов туркманистонлик Аттабек Ҳожиевга 0:5 ҳисобида мағлуб бўлиб, мусобақани тарк этди. Ойбек Алимжонов 46 кг вазн тоифасида турнир мезбони Султон Шаннакни 5:0 ҳисобида мағлуб этиб, ярим финалга йўл олди.
43 кг вазн тоифасида иштирок этган Райҳона Алимханова Хитой Тайбэйлик рақибаси Сяо-Тин Шаони 3:2 ҳисобида ютиб, ярим финалга чиқди. 37 кг вазн тоифасида Сабинаҳон Камилжонова ғалаба қозонди - унинг рақибаси, Хитой Тайбэйлик Пэй-Юн Чианг, белгиланган вазн меъёрига сиғмади.
