Олимпиада-2028: Миллий федерациялар боксдаги янги вазн тоифаларидан норози
Яқинда Жаҳон бокс ташкилоти Лос-Анжелесда бўлиб ўтадиган 2028 йилги Олимпия ўйинлари учун расмий вазн тоифаларини эълон қилди. Аммо ушбу қарор бир қатор миллий бокс федерацияларининг норозилигига сабаб бўлди.
Хусусан, Хитой расмийлари Жаҳон бокс федерациясига мурожаат қилиб, вазн тоифаларини қайта кўриб чиқишни сўрашди. Ирландия бокс федерацияси ҳам бу талабни қўллаб-қувватлади. Ирландия олимпия ўйинларида енгил вазн тоифаларида кўп бор медаллар ютган, шу сабабли улар ушбу тоифани қайта киритиш тарафдори.
Энг кўп эътирозларга эркаклар ўртасида вазн тоифаларининг еттига қисқартирилиши сабаб бўлди. Энди энг енгил вазн 55 кг этиб белгиланган. Солиштириш учун, Рио-2016, Токио-2020 ва Париж-2024 Олимпиадаларида 49, 51 ва 52 кг вазн тоифаларида ҳам медаллар учун кураш бўлган. Ўзбекистон терма жамоаси айнан ана шу енгил вазнларда катта ютуқларга эришган — Хасанбой Дўсматов Риода ва Парижда Ўзбекистонга олтин медаллар олиб келган.
Янги регламентга кўра, Лос-Анжелес Олимпиадасида эркаклар 55, 60, 65, 70, 80, 90 ва +90 кг вазн тоифаларида, аёллар эса 51, 54, 57, 60, 65, 70 ва 75 кгда рақобатлашади. Миллий федерациялар эса вазн тоифаларини янада мувозанатли қилиш ва енгил вазндаги иқтидорли ёшлар манфаатларини ҳимоя қилишни талаб қилмоқда.