Муҳаммад Шеховнинг навбатдаги жанг санаси ва рақиби маълум бўлди
Бухоролик чарм қўлқоп устаси Муҳаммад Шеховнинг навбатдаги жанг санаси ва рақиби тасдиқланди. 5 июл куни у Екатеринбург шаҳридаги RCC Boxing Promotions ташкил қилаётган бокс кечасида аргентиналик Родриго Фабиан Руизга қарши жанг қилади.
Ушбу тўқнашувда ғолиб чиққан боксчи WBAнинг иккинчи энг енгил вазн (55,3 кг) тоифасидаги рейтингида иккинчи ўринга кўтарилади.
Шехов (16-0-1, 4 KO) ҳозиргача мағлубият кўрмаган. У WBO ва WBA рейтингларида Топ-10ликда қайд этилган ҳамда IBF Inter-Continental камари соҳиби ҳисобланади. Бу камарни у 2023 йил сентябр ойида Челябинскда қўлга киритганди. Жорий йил Будапештда бўлиб ўтган жангда у Орландо Моралесни мағлуб этган.
Рақиби — Руиз (22-0, 16 KO) ҳам ҳозирча мағлубият ва дурангни бошидан ўтказмаган. Унинг 22 ғалабасининг 16 таси нокаут билан якунланган. Руиз WBA ва IBF рейтингларида Топ-15 орасида жой олган ва Жанубий Америка чемпионлигини 10 марта ҳимоя қилган.
Қизиғи, айнан шу вазн тоифасида Муроджон Аҳмадалиев мутлақ чемпионлик учун ҳаракат қилмоқда — у 14 сентябр куни ўз мақсадига етиши мумкин.
