Фьюри — Жошуа жанги бекор бўлиши мумкин
Оғир вазн юлдузлари Тайсон Фьюри ва Энтони Жошуа ўртасидаги кутилаётган супер-жанг бекор бўлиш хавфи остида қолди. Бунга жанг промоушенида Дана Уайтнинг иштироки бўйича юзага келган келишмовчилик сабаб бўлаётгани айтилмоқда. Бу ҳақда The Ring ва Sports Illustrated манбалари хабар бермоқда.
Маълумотларга кўра, жангнинг асосий инвестори Турки Ал аш-Шайх Дана Уайт ва унинг Zuffa Boxing лойиҳасини промоутер сифатида жараёнга жалб қилмоқчи. Бироқ Жошуа ва унинг промоутери Эдди Хирн бунга қарши. Хирн аввалроқ имзоланган шартномаларда Zuffa Boxing’нинг промоушенда қатнашиши кўзда тутилмаганини таъкидлаган эди.
Шу сабаб жанг амалга ошмай қолиши эҳтимолига қарши муқобил вариантлар ҳам кўриб чиқилмоқда. Улар орасида Теренс Кроуфорд — Райан Гарсия ҳамда Тайсон Фьюри — Дэвид Бенавидес жанглари тилга олинмоқда.
Маълумот учун, Фьюри ва Жошуа жанги ҳозирча 11 декабрь куни Кардиффдаги “Principality Stadium”да ўтказилиши режалаштирилган. Бироқ промоутерлик масаласи якуний ҳал этилмагани сабаб жанг атрофидаги ноаниқлик сақланиб қолмоқда.
