Энтони Джошуа Тайсон Фьюрини биринчи раунддаёқ нокаут қилишни режалаштирмоқда
Британиялик оғир вазн боксчиси Энтони Джошуа Тайсон Фьюрига қарши бўлажак жанг учун дадил прогноз берди. Икки карра собиқ жаҳон чемпионининг айтишича, у рақибини муддатидан олдин мағлуб этишни мақсад қилган ва нокаут ҳатто биринчи раунддаёқ юз бериши мумкин.
“Ростини айтсам, нокаут кутяпман. Бу ҳатто биринчи раундда ҳам содир бўлиши мумкин”, — деди Джошуа Sky Sports News’га берган интервьюсида. Боксчи бу шунчаки тахмин эмаслигини, айнан шундай жанг режасига эга эканини ҳам тасдиқлади.
Джошуа ва Фьюри 11-декабрь куни Кардиффдаги “Principality Stadium”да рингга кўтарилади. Уларнинг жанги британиялик икки машҳур оғир вазн вакили ўртасида қарийб ўн йил давомида кутилган қарама-қаршиликка нуқта қўяди. Боксчилар 30-сентябрь куни Лондонда жанг олдидан илк бор юзма-юз келишди.
Маълумот учун, 36 ёшли Джошуа профессионал фаолиятида 27 та жангни нокаут билан якунлаган. 38 ёшли Фьюри эса фаолияти давомида ҳали бирор марта нокаут билан мағлуб бўлмаган. Шу сабаб Джошуанинг биринчи раунддаги нокаут ҳақидаги баёноти жанг олдидан катта қизиқиш уйғотди.
