Автоҳалокатга учраган Joshua шифохонадан чиқарилди
IBF, WBA, WBO ва IBO версиялари бўйича супероғир вазнда собиқ жаҳон чемпиони бўлган британлик Энтони Joshua Нигериянинг Лагос шаҳридаги нуфузли шифохонадан чиқарилди. Бокчи ўлим билан якунланган йўл-транспорт ҳодисасида иштирок этганидан сўнг шифохонага ётқизилганди.
«Энтони Joshua чоршанба куни кечқурун шифохонадан чиқарилди. Шифокорлар унинг уй шароитида соғайишини маъқуллашди. Бироқ у икки нафар яқин дўстини йўқотгани сабабли оғир руҳий ҳолатда», — дея Лагос ва Огун штатлари раҳбариятининг сўзларини келтиради Daily Mail.
Манбага кўра, бокчи бир неча кун давомида Нигерияда қолади ва тикланиш жараёнини уйда давом эттиради.
Маълум қилинишича, фожиа 29 декабрь куни Лагос — Ибадан автомагистралида содир бўлган. Энтони Joshua бўлган Lexus русумли йўлтанламас йўлда тўхтаб турган юк машинасига бориб урилган. Авария оқибатида икки киши — бокчининг мураббийлари — ҳалок бўлган.
