Александр Усик «Usyk17» промоутерлик компаниясини қайта тиклади
Компания жорий баҳорда Киевда йирик бокс кечасини ўтказишни режалаштирмоқда.
ФОТО: Getty Images
Оғир вазн тоифасида WBA, WBC, IBF ва IBO йўналиши бўйича амалдаги мутлоқ жаҳон чемпиони, мағлубиятсиз Александр Усик ўзининг «Usyk17» промоутерлик компанияси фаолияти қайта тикланишини маълум қилди.
Компания жорий баҳорда Киевда йирик бокс кечасини ўтказишни режалаштирмоқда.
«Usyk17 қайтади. Шу баҳорда Киевда катта турнир ўтказмоқчимиз, унинг санасини бироздан кейин эълон қиламиз. Унда фақат украиналик ёш ва истиқболли боксчилар иштирок этади. Биз бу йигитларга ўз мақсадларига эришишда ёрдам берамиз. Мамлакатимизда янги чемпионлар етишиб чиқиши учун қўлимиздан келган барча ишни қиламиз», — деб ёзди Усик ўз ижтимоий тармоқларида.
Компания билан илк шартномаларни имзолаш ва бўлажак тадбирларнинг расмий анонслари февраль ойи охирида кутилмоқда.
Насрулло Каримов
Журналист