Александр Усик профессионал фаолиятини қачон якунлашини маълум қилди
Оғир вазн тоифасида WBA, WBC, IBF ва IBO камарлари соҳиби, 39 ёшли мағлубиятсиз украиналик боксчи Александр Усик профессионал боксдаги фаолиятини қачон якунлашни режалаштираётганини маълум қилди.
«Яна бир ярим йил ва Усик... Мухлисларим, мураббийларим, жамоам ҳамда мени 2012 йилдан, кимдир эса халқаро майдондаги илк муҳим ғалабаларимни қўлга киритган 2006 йилдан бери кузатиб келаётган барча инсонлар учун видео мурожаат ёзиб оладиган санани белгилаб қўйганман», — деди Усик ўзининг «USYK17» YouTube-каналига берган интервьюсида.
Эслатиб ўтамиз, Усик ўтган йилнинг 20 июль куни Лондон (Буюк Британия) шаҳридаги «Уэмбли» стадионида бўлиб ўтган сўнгги жангида британлик Даниел Дюбуа билан тўқнаш келган эди. Александр бешинчи раундда рақибини нокаутга учратиб, ғалаба қозонди. Ушбу реванш жангда оғир вазн тоифасидаги мутлақ жаҳон чемпионилик унвони тикилган эди.
Усикнинг профессионал рекорди 24 та ғалабадан иборат бўлиб, уларнинг 15 тасини муддатидан олдин қўлга киритган ва бирорта ҳам мағлубиятга учрамаган. Александр профессионал боксда 2013 йилнинг ноябрь ойида дебют қилган.
