Иккинчи мавсумлар қироли Анге Постекоглу! Нима учун ва қандай қилиб?
"Мен ҳар доим иккинчи мавсумда чемпион бўламан. Ҳеч нарса ўзгармади. Бунга ишонишимга қарамасдан бирор нарса демоқчи эмасман"
Юқоридаги иқтибосни қўпол кайфиятда бўлган Анге Постекоглу Сентябр ойида уйда “Арсенал”га қарши 1:0 ҳисобида мағлубиятга учраганидан сўнг бутун мавсум давомида қайтариб келган эди.
Бир кам олтмишни қаршилаган Австралиялик мураббий “шпорлар”ни 2023 йил июлда қабул қилиб олган ва чоршанба оқшомида “Манчестер Юнайтед”ни мағлуб этганидан сўнг табассум қилди.
Сўнгги бор 2008 йили Англия Лига кубогини ютган ва ундан кейин омадсизликка учраб келаётган лондонликлар Анге Постекоглунинг мавсум бошидаги иқтибослари рост эканлигини исботлай олди. Бу ғалаба “Тоттенхэм”нинг премьер-лигадаги энг ёмон мавсумларидан бирида, чемпион “Ливерпул”дан 45 очко ортда қолиб 17-ўринни қайд этган даврда содир бўлди.
“Шпорлар” бошқарувидаги ўзининг юбилей юзинчи ўйинида қўлга киритилган Европа Лигаси кубоги нафақат клубнинг келаси мавсум Чемпионлар Лигасида иштирок этишини таъминлади, балки унга нисбатан қилинган кўплаб танқидларга муносиб жавоб бўла олди ҳамда катта эҳтимол билан ўз иш фаолиятида давом этишини нақд қилди.
У "South Melbourne" ҳамда “Brisbane Roar” каби Австралия клублари билан, шунингдек Япониянинг “Yokohama Marinos” жамоаси билан ўзининг бошқарувдаги иккинчи мавсумида совринлар ютган.
Постекоглу Австралия терма жамоаси билан Осиё кубогини, “Селтик” билан эса Шотландия чемпионлигини қўлга киритган.
“Селтик” (Июн 2021-Июн 2023)
Қаҳрамонимиз 2021 йил июн ойида “Селтик” билан шартнома имзолади ва бу вақтда “Ливерпул” афсонаси Стивен Жеррард “Рейнджерс” билан Шотландия чемпионлигини қўлга киритган эди. Лекин, Австралиялик мураббий соврин учун иккинчи мавсумни кутмади, у икки йил ичида бешта совринни жамоасига олиб берди. Улар биринчи мавсумда Шотландия чемпиони ҳамда лига кубоги соҳиби бўлишди ва иккинчи мавсумда “Тоттенхэм”га кетишидан олдин Шотландия кубогини ҳам ютиб, требл қайд этди.
Собиқ Англия терма жамоаси дарвозабони Жо Харт “Селтик”нинг муваффақиятларига кўмакчи бўлишидан олдин, “Манчестер Сити” билан икки бор чемпионликни нишонлаб улгурган эди. Постекоглунинг энг кучли жиҳатларидан бири футболчиларнинг ўйиндаги турли жиҳатларини кўра олиши ва уларга янги қобилиятларни ўргатиши эканлигини Жо Харт ҳис қилди.
“У энг зўри, ҳақиқатда жуда-жуда яхши”, — деб таъкидлаган эди собиқ терма жамоа дарвозабони 2023 йил май ойидаги чемпионликдан сўнг. “Турли хил жамоаларда муваффақиятли ўйнаганман. Футболни англаш ҳар доим бўлган, лекин ҳақиқий услуб билан ўйнаш бу ҳаётимда биринчи марта бўляпти. Қисқа ёки хавфли пасларни яратишда ўзимда хотиржамликни ҳис қиламан”, — деб фикр билдирган эди Харт.
Ўйинлар: 113 та. Ғалабалар: 83 та. Дурранглар: 12 та. Маглубиятлар: 18 та. Урилган голлар: 284 та. Ўтказиб юборилган голлар: 108 та.
“Yokohama Marinos” (Январ 2018-Июн 2021)
Австралиялик мутахассис “Селтик” клубига келишидан олдин Япониянинг “Yokohama Marinos” жамоасида уч ярим йил фаолият юритган. 2018 йили Кун чиқар юртига ташриф буюрган мураббий ўзининг биринчи ўн ойлик ишлаган давридаёқ илк совринни қўлга киритишга жуда яқин келди, аммо J лига кубоги финалида “Shonan Bellmare” жамоасига кичик 1:0 ҳисобида мағлуб бўлди. Лекин орадан ҳеч қанча вақт ўтмасдан Япония чемпионлигини қўлга киритди. Бу орқали Япония суперкубогида иштирок этиш имконияти пайдо бўлди, бироқ Суперкубокда 1:0, 2:1, 3:2 ҳолатларидан 3:3 кўринишгача курашиб, пенальтилар сериясида 3:2 ҳисобида мағлубиятга учради.
“Анге клуб учун мақсад бера олди”, — деб ёзади япон ёзувчиси Дан Орловиц. "Бу- лига ҳақиқатда кўрмаган футбол услубининг янгиланиши эди. Мураббий илк келганида натижалар бирданига яхши бўлиб кетмаган бўлса-да, у нима қилаётганини биларди ва ўз ўйин услубига ишонарди. Мухлислар унинг натижа қилишига ишонарди. Кейинги мавсумда мураббийнинг режаларига кирмайдиган футболчиларга жавоб берилди ва ўйин услуби учун мос келадиган ўйинчилар жамоага таклиф қилинди. Натижада 2019 йил кубок қўлга киритилди.
Ўйинлар: 161 та. Ғалабалар: 79 та. Дурранглар: 30 та. Маглубиятлар: 52 та. Урилган голлар: 313 та. Ўтказиб юборилган голлар: 228 та.
Австралия терма жамоаси (Октябр 2013-Ноябр 2017)
Футболчилик фаолиятида ҳимоячи бўлган қаҳрамонимиз Австралия миллий терма жамоасига тўрт марта чақирув олган. 2013 йилда эса ватан жамоасини бошқариш имконияти пайдо бўлди.
2014 йил Бразилияда бўлиб ўтган Жаҳон чемпионатида, Кенгрулар юрти Нидерландия, Чили ва 2010 йилги Жаҳон чемпионлари Испания терма жамоалари билан бир гуруҳдан ўрин олиб, мусобақани сўнгги ўринни эгаллаган ҳолда эрта тарк этди.
2015 йилги Осиё чемпионатига Австралия мезбонлик қилди. Етмиш олти мингдан зиёд мухлислар томоша қилган финал учрашувида мезбонлар Жанубий Корея терма жамоасини 2:1 ҳисобида мағлуб этиб, Осиёда тенгсиз эканлигини исботлади.
Ўшанда ярим ҳимоячи Массимо Луонго ҳисобни очган ва 91-дақиқада “Тоттенхэм”нинг ҳозирги сардори Сон Мин ҳисобни тенглаштирган ҳамда қўшимча дақиқаларда Жеймс Троиси “сариқлар”нинг ғалабасини таъминлаган эди.
Тим Кехил 2014 йили интервьюларидан бирида мураббий ҳақида шундай деган эди: “Уни Австралия терма жамоасида иш бошламагунича ҳеч қачон танимаганман. У ажойиб инсон. Уни тингласангиз кўрсатмалари оддий ва мантиқий эди. Футболчилар ҳам худди шу нарсани хоҳлашарди”
Ўйинлар: 49 та. Ғалабалар: 22 та. Дурранглар: 12 та. Маглубиятлар: 15 та. Урилган голлар: 86 та. Ўтказиб юборилган голлар: 58 та.
“Brisbane Roar” (Октябр 2009-Апрел 2012)
Австралияни бошқаришидан аввал Анге Постекоглу икки ярим йил “Brisbane Roar” клубида ишлади. 2010/11 йилда А лига чемпионлигини қўлга киритди, бу ҳам унинг иккинчи мавсумига тўғри келди.
Ўша пайтдаги жамоа сардори Мат Смиз шундай эслайди: “Ҳеч қачон ўзимизни хотиржам ҳис қилмаганмиз. Бир-биримизни ҳар доим яхшироқ бўлиш учун, ривожланиш учун ундар эдик. Ёш ўйинчи бўласизми ёки ёши каттами бунинг фарқи йўқ эди. Агар уни айтганини қилмасангиз шафқатсизларча жазолар эди”
Ўйинлар: 83 та. Ғалабалар: 42 та. Дурранглар: 24 та. Маглубиятлар: 17 та. Урилган голлар: 142 та. Ўтказиб юборилган голлар: 91 та.
Австралия U17 ва Австралия U20 (Январ 2001-Феврал 2007)
Етти йиллик ёшлар билан ишлаш фаолияти давомида Анге Океания чемпионатида ғолиб бўлган.
"South Melbourne" (Январ 1996-Декабр 2000)
Постекоглу фаолиятини Австралия миллий лигасининг “South Melbourne” жамоасида бошлаган. Қисқа фурсат ичида учта совринни қўлга киритган. Булар 1997/98 ҳамда 1998/1999 йилги мавсумларда миллий лига чемпионлигини, шунингдек клублар ўртасида 1998/1999 йилги Океания чемпионати ғолиблиги ҳисобланади.
Ўйинлар: 155 та. Ғалабалар: 82 та. Дурранглар: 30 та. Маглубиятлар: 43 та. Урилган голлар: 276 та. Ўтказиб юборилган голлар: 194 та.
“Тоттенхэм” ўз-ўзидан чемпион бўлиб қолмади. Бош мураббий Анге Постекоглу ҳам ўз-ўзидан шу даражага етиб келмади. Юқоридагилар бунга исбот бўла олади. Сиз ҳам мақолани ўқиб, “эххе бу мураббий динозаврлар давридан бери бор экан-ку!”, деб ўйлаётган бўлсангиз ажаб эмас. Инсон тинимсиз ва давомий меҳнат қилса, у аста-секин тажрибага айланади ҳамда йиғилган тажриба албатта катта натижага айланади. Бугунги қаҳрамонимиз ҳам ана шундай даврни бошидан ўтказди. Sports24.uz орқали қизиқарли ва ҳаётий мақолаларни ўқиб боринг, саломат бўлинг.
