Эркин агентга айланаётган юлдузлар. Топ-13
Ҳар қандай футболчи вақти келиб жамоасини тарк этишга мажбур бўлади. Вақт олий ҳакам деб бежиз айтишмаган. Ёзги трансфер вақтида жамоасини жамоасини ўзгартириши кутилаётган ўйинчилар ҳақида сўз юритамиз. Қани, унда бошладик.
Ибраима Конате, 26 ёш, «Ливерпуль»
Трансфер қиймати: 50 миллион евро
Шартномаси якунланиш арафасида турган футболчилар орасида энг юқори баҳоланган ўйинчи — 50 миллион евро. Франциялик ҳимоячи дастлаб собиқ жамоадоши Трент Александр-Арнолднинг йўлини такрорлаб, эркин агент мақосида “Реал” сафига ўтишни режалаштирган эди. 2025 йил охирига қадар айнан шу сценарий энг эҳтимолий деб баҳоланган ва шу сабабли унинг “Ливерпуль” билан янги шартнома борасидаги музокаралари ҳам секинлашган.
Бироқ мадридликлар бу ғоядан воз кечгач, вазият ўзгарди. Испанияга кўчиш амалга ошмаганидан кейин Конате музокараларда анча муросага кела бошлади ва клубдан кўпроқ маош талаб қилиш уринишларини тўхтатди. Ҳимоячи барча масалаларни жаҳон чемпионати бошланишидан олдин ҳал этишни режалаштирмоқда ва аллақачон «Энфилд»да қолишини маълум қилган. Яқин орада расмий баёнот ҳам кутилаётгани шубҳасиз.
Душан Влахович, 26 ёш, «Ювентус»
Трансфер қиймати: 35 миллион евро
Сербиялик ҳужумчининг келажаги эса бунчалик аниқ эмас. “Ювентус” анчадан буён у билан шартномани узайтириш жараёнини бошлаган, бироқ айрим бандлар бўйича ҳалигача келишувга эришилмаган. Шу билан бирга, жамоа бош мураббийи Лучано Спаллетти Душанни Туриндаги ўз лойиҳасининг марказий фигураси сифатида кўради ва уни сақлаб қолиш зарурлигини мунтазам равишда раҳбариятга эслатиб келмоқда.
Айни пайтда вазиятни яқиндан кузатаётган “Бавария” ҳам фаол ҳаракат қилмоқда.
Бернарду Силва, 31 ёш, «Манчестер Сити»
Трансфер қиймати: 27 миллион евро
“Манчестер Сити” учун ҳақиқий афсона саналган португалиялик ярим ҳимоячи “шаҳарликлар” сафида ўтказган ўйинлари сони бўйича еттинчи ўринни эгаллайди. Ундан юқорида фақат ўтган асрнинг биринчи ярмида туғилган футболчилар жой олган. Яна бир мавсум ўйнаганида, у кучли учликка ҳам кириши мумкин эди, аммо бу амалга ошмайди.
«Мен бу клубга “Ман Сити” футболчиси сифатида келган эдим, аммо кетар эканман, ўзингиздек — умрбод “Ман Сити” мухлиси сифатида кетяпман», — дея ёзди Бернарду хайрлашув мурожаатида.
Унинг кейинги манзили ҳозирча номаълум. Сўнгги ойларда тарқалган турли инсайдлар “Барселона” билан принципиал келишувга эришилганини таъкидлаб келаётган эди. Бироқ май ўрталарида кутилмаганда “Ювентус” ҳам саҳнага чиқди ва португалияликка йилига саккиз миллион евро маош билан 2+1 шаклидаги шартнома таклиф қилди. Танлов эса футболчининг ўзига боғлиқ.
Юлиан Брандт, 30 ёш, «Боруссия Дортмунд»
Трансфер қиймати: 20 миллион евро
Брандт 30 ёшни қарши олди. У ҳалигача ўз жамоаси учун жуда муҳим футболчилардан бири ҳисобланади: “Боруссия Д” сафида 306 та ўйин ўтказган ва бу кўрсаткич бўйича клуб тарихида 18-ўринни эгаллайди. Олдиндаги 307-учрашув эса унинг сўнггиси бўлади.
2025 йил ноябрида дортмундликлар Брандт билан шартномани узайтиришни истаб, унга маошни камайтириш шарти билан янги битим таклиф қилган эди. Бир неча ойдан сўнг клуб спорт директори Ларс Риксен шундай хулоса қилди: «Очиқ мулоқотлардан сўнг шартнома узайтирилмаслигига келишиб олдик».
Футболчининг кейинги манзили бўйича турли тахминлар мавжуд — “Барселона”, “Арсенал” ва “Астон Вилла” каби клублар тилга олинмоқда. Аммо ҳозирча уларнинг ҳеч бири билан жиддий илгарилаш кузатилмаяпти.
Леон Горецка, 31 ёш, «Бавария»
Трансфер қиймати: 15 миллион евро
“Бавария” раҳбарияти немис ярим ҳимоячиси билан хайрлашишга 2024 йилдаёқ уриниб кўрган эди. Ўшанда клуб ҳеч бўлмаса маълум миқдорда трансфер маблағи ишлаб олиш имконига эга эди. Бироқ ўтган ёзга келиб ҳам вазиятга аниқлик киритилмади — на трансфер, на янги шартнома борасида. Натижада 2026 йил 1 июлдан бошлаб Горецка эркин агент мақомига эга бўлади.
Футболчининг ўзи бу ҳолатни «ҳам футболчи, ҳам шахс сифатида янги саҳифа» дея таърифламоқда.
Аввалига уни сафига қўшиб олишда “Арсенал” асосий даъвогар сифатида қаралган. Бироқ бу сценарий амалга ошмади. Мавсум якунига яқин эса “Милан” немис футболчисига жиддий қизиқиш билдирмоқда.
Фабиньо, 32 ёш, «Ал-Иттиҳод»
Трансфер қиймати: 13 миллион евро
Бу мавзу негагадир кам ёритилмоқда. Таъянч ярим ҳимоячи бир неча ойдан буён ноаниқ ҳолатда — бу клуб позициясининг мавҳумлиги сабабми ёки унинг Европага қайтиш истагими, аниқ эмас. Балки иккиси ҳам тўғридир. Бразилиялик қарийб уч йилдан буён Саудия Арабистонида фаолият юритмоқда ва мамлакат ҳақида фақат ижобий фикрлар билдириб келган.
Бироқ шартнома тугашига яқинлашмоқда, янги келишув ҳақида эса ҳеч қандай маълумот йўқ. 10 май куни футболчи журналистлар олдида келажаги ноаниқлигини айтди, аммо яқин кунларда барчаси ойдинлашишини таъкидлади. “Ал-Иттиҳод” раҳбарияти қандай қарор қабул қилиши ҳал қилувчи аҳамиятга эга.
Эндрю Робертсон, 32 ёш, «Ливерпуль»
Трансфер қиймати: 10 миллион евро
Яна бир муҳим футболчи ва унинг клуб билан муносабатлари деярли якунланган. Шотландиялик ҳимоячи “Ливерпул”нинг Юрген Клопп давридаги муваффақиятларида асосий фигуралардан бири бўлган ва Трент билан қанот ҳимоясида ажойиб жуфтликни ташкил этган.
Бироқ ҳозирги мавсумда унинг роли кескин камайди. Шартнома якунланмоқда ва хайрлашиш вақти келди. Қишда “Тоттенхэм”га ўтиш ҳақида гап-сўзлар бўлган, аммо трансфер амалга ошмаган. Ёзда бу эҳтимол яна кучайиши мумкин. Агар лондонликлар Чемпионшипга тушиб кетмаса, Робертсон айнан шу жамоага йўл олиши мумкин.
Антонио Рюдигер, 33 ёш, «Реал Мадрид»
Трансфер қиймати: 9 миллион евро
“Реал”даги вазият анча мураккаб: жанжаллар, ички низолар ва натижаларнинг қониқарсизлиги. Немис ҳимоячиси бу муаммолар марказидаги асосий фигуралардан бири сифатида тилга олинмоқда. Европа ОАВларига кўра, у жамоадоши Альваро Каррерасни ҳақорат қилган ва ҳатто кийиниш хонасида унга зарба берган.
Шундай вазиятга қарамай, апрель ойида клуб уни 2027 йилгача қолдиришни кўриб чиққан эди. Бироқ орадан бир неча ҳафта ўтиб, позиция ўзгарди. Трансфер сиёсати нуқтаи назаридан кимнидир сотмасдан туриб янги футболчи олиш қийин. The Athletic маълумотига кўра, кузга келиб Рюдигер Испанияда қолмайди. Декабрда Саудия Арабистони варианти ҳам тилга олинган.
Каземиро, 34 ёш, «Манчестер Юнайтед»
Трансфер қиймати: 8 миллион евро
«Яна бир йилми? Асло. Бу тўрт йил ажойиб ўтди. Клубга ҳам, мухлисларга ҳам миннатдорман. Энг қадрлайдиган нарсам — айнан шу мухлислар. Аммо йўқ, барчаси якунланди. Бу ердаги даврим тугади», — деди бразилиялик таянч ярим ҳимоячи ESPN’га берган интервьюсида.
“Манчестер Юнайтед” мухлислари уни қолишга чақирган бўлса-да, футболчи қарорини ўзгартирмади. Клуб раҳбарияти ҳам музокара ўтказган, аммо у ғалаба руҳига эга жамоага ўтишни истамоқда. Айрим тахминларга кўра, у “Интер Майами”га йўл олиши мумкин.
Роберт Левандовски, 37 ёш, «Барселона»
Трансфер қиймати: 8 миллион евро
Тажрибали ҳужумчи ҳозир “Барселона” тарихидаги энг яхши тўпурарлар ўнлигига киришдан атиги бир гол узоқликда турибди. Унинг Испаниядаги фаолиятини мукаммал деб бўлмайди, аммо гол уриш вазифасини бажариб келди.
Ёш ўз таъсирини ўтказмоқда — у энди “Бавария”даги каби юқори самарадорлик машинаси эмас. “Барселона” янги асосий ҳужумчи излаши кутилмоқда. “Бетис”га қарши баҳсда футболчи кўзларида ёш билан “Камп Ноу”даги мухлислар билан хайрлашди. Унга кўплаб жамоалар қизиқмоқда. Лекин Роберт келажаги борасида бир қарорга келмаган.
Дани Карвахаль, 34 ёш, «Реал Мадрид»
Трансфер қиймати: 6 миллион евро
Карвахал охирги вақтларда ўйин амалиёти камлиги сабаб норозилик билдирди. Охири клуб Дани билан шартномани узайтирмасликка қарор қилди. Футболчи аллақачон жамоа ишқибозлари билан хайрлашди.
Аслида Мадридда Модрич ва Начо кетганидан сўнг у лидер бўлиши керак эди, аммо бу ролни бажара олмади. Футболчи катта эҳтимол билан Яқин Шарққа йўл олиши кутилмоқда.
Пауло Дибала, 32 ёш, «Рома»
Трансфер қиймати: 5 миллион евро
Аргентинага нисбатан клубнинг муносабати ғалати. Унинг сўзларига кўра, “Рома” ҳалигача келажак бўйича ҳеч қандай мулоқот бошламаган. «Мен ҳеч нарса билмайман, ўзим ҳам билишни истайман», — дейди у.
Шу билан бирга, Дибала жамоада қолиш учун маошни камайтиришга ҳам тайёр. Бош мураббий Жан-Пьеро Гасперини ҳам уни қўйиб юбормоқчи эмас. Қарор эса клуб эгасига боғлиқ. Аммо Дибала аллақачон “Рома” ишқибозлари билан хайрлашди. Кетиш онлари аллақачон аниқ.
Лука Модрич, 40 ёш, «Милан»
Трансфер қиймати: 4 миллион евро
Сентябрда 41 ёшга тўладиган хорват ярим ҳимоячиси фаолиятини якунлайди, деб ўйлаш мумкин эди. Аммо у ҳали ҳам юқори даражада ўйнамоқда. “Милан” сафида у нафақат мослашди, балки А Сериянинг энг яхши ўйинчиларидан бирига айланди.
Журналист Маттео Моретто маълумотига кўра, клуб ва Модрич ўртасида яна бир йиллик шартнома бўйича келишув мавжуд. Мураббий Масимиллиано Аллегри ҳам унга ишонч билдирмоқда. «Милан» Чемпионлар лигасига қайтишни режалаштираётган бир пайтда, бундай тажрибали плеймейкер жамоа учун жуда муҳим ҳисобланади.
