«Челси»нинг энг тушунарсиз трансферлари: Гарначо, Феликс, Обамеянг ва бошқалар
«Челси» ҳозирги эгалари қўли остида кўплаб катта, жасоратли ва баъзида ўйланмасдан қабул қилинган трансфер қарорларига қўл урди.
Албатта, муваффақиятли трансферлар ҳам бўлди. Коул Палмер анча қимматга тушган бўлса-да, ўзини тўлиқ оқлади. Мойсес Кайседо учун ҳам катта маблағ тўланганди, аммо эквадорлик яримҳимоячи ишончли футболчига айланди.
Очиб айтганда, омадсиз трансферлар ҳам бўлди. Рахим Стерлинг, Калиду Кулибали, Михаил Мудрик… Айниқса, жуда иқтидорли украиналик футболчининг тақдирига ачиниш мумкин.
Келинг, «Челси»нинг сўнгги йиллардаги энг баҳсли ва тушунарсиз трансферларини эслаб ўтамиз.
Алехандро Гарначо
Хавфли қарор эди ва у ўзини оқламади. Гарначо «Манчестер Юнайтед»да, ҳатто сўнгги мавсумида ҳам иқтидорли футболчи сифатида қараларди. Шунга қарамай, «Челси» ўтган ёзда аргентиналик футболчини сотиб олди.
Лондонликлар таваккал қилди, аммо Гарначо АПЛда атиги битта гол урди. Шундан сўнг у «Астон Вилла»га ижарага берилди.
Кирнан Дьюсбери-Холл
Эҳтимол, бу футболчи шунчаки «Челси» даражасига мос келмаган. У 2024 йилда «Лестер» билан Чемпионшипдаги мавсумдан сўнг «Челси»га қўшилди. Шу тариқа Энцо Мареска ортидан «Стэмфорд Бридж»га кўчиб ўтди.
Аммо бу Дьюсбери-Холл учун жуда катта қадам бўлиб чиқди. Мареска билан аввалдан танишлиги ҳам унга ёрдам бермади. Яримҳимоячи «Челси» таркибида АПЛда атиги икки марта асосий таркибда майдонга тушди.
Шундан бери у «Эвертон»да ўзини қайта намоён қила бошлади. Эҳтимол, айнан шу даражадаги клубда Дьюсбери-Холл ўз имкониятларини тўлиқ кўрсата олади.
Чезаре Казадеи
BlueCo компанияси клубни сотиб олганидан кўп ўтмай, «Челси» ёш футболчиларга катта маблағ сарфлай бошлади. 19 ёшли Казадеи учун ҳам 16 миллион фунтдан ортиқ пул тўланди.
Эътиборлиси, ўша вақтда яримҳимоячи «Интер» асосий жамоасида ҳатто дебют ҳам қилмаган эди. Казадеи «Челси» сафида 17 та учрашув ўтказди. Ундан олдин эса «Лестер»да ижара асосида тўп тепди. Бироқ Мареска билан ишлагани ҳам уни Ғарбий Лондондаги фаолиятига тайёрлай олмади.
Ҳозир эса Казадеи Италиядаги фаолиятини давом эттирмоқда ва «Торино» шарафини ҳимоя қиляпти.
Филип Йоргенсен
«Челси» 2024 йилда Йоргенсенни сотиб олганида Роберт Санчеснинг асосий дарвозабон сифатидаги мақоми борасида жиддий саволлар бор эди.
Йоргенсен «Вильярреал»даги муваффақиятли мавсумида ўзининг яхши ўйини билан эътиборни тортганди. Аммо датиялик дарвозабон Санчес билан асосий таркиб учун муносиб рақобат қила олмади.
Аксинча, испаниялик футболчи ривожланишда давом этди. Энди эса Йоргенсеннинг «Челси»даги келажаги савол остида қолмоқда.
Дейвид Вашингтон
«Челси»нинг истиқболли футболчиларни сотиб олишида маълум мантиқ борлигини таъкидлаш мумкин. Бундай футболчиларни келажакда қимматроқ нархга сотиш мумкин.
Аммо муаммо шундаки, агар футболчи трансфердан кейин шунчаки йўқолиб қолса, бу мантиқнинг ўзи ҳам иш бермайди.
Вашингтон билан ҳам худди шундай ҳолат юзага келганга ўхшайди. «Сантос»дан 18 ёшида келган ҳужумчи «Челси»даги дебют мавсумида асосий жамоа сафида атиги учта учрашув ўтказди.
Ренато Вейга
«Базель»дан «Челси»га кўчиш йўналишида Вейгадан олдин 2024 йилда фақат Муҳаммад Салоҳ бор эди.
Португалиялик футболчи «Базель»да асосан яримҳимояда ўйнарди. «Челси»да эса ундан кўпроқ чап қанот ҳимоячиси сифатида фойдаланишди. Кейинчалик у марказий ҳимояда ҳам ҳаракат қилди.
Натижада Вейга ярим мавсум ўтиб «Челси»ни тарк этди ва «Ювентус»га ижарага берилди. Кейин эса «Вильярреал»га сотилди.
Пьер-Эмерик Обамеянг
«Барселона»нинг тажрибали ҳужумчисини, АПЛда ўйнаган ва жамоангиз мураббийи қўл остида аввал ҳам тўп тепган футболчини таркибга қўшиб олиш — биринчи қарашда ёмон ғоя эмасдек туюлади.
Аммо Обамеянг трансферидан кўп ўтмай Томас Тухель истеъфога чиқарилди.
Пьер-Эмерик «Челси»да омадсизликка учради. У АПЛда атиги битта гол урди ва кейинги ёзда клубни тарк этди. Бироқ лондонликлар «Арсенал»нинг собиқ ҳужумчиси учун 10,3 миллион фунт тўлаган эди.
Диего Морейра
2023 йилда «Бенфика»дан «Челси»га ўтган Морейра лондонликлар сафида атиги битта учрашувда майдонга тушди. Кейин «Лион»га ижарага берилди.
У «Бенфика» асосий жамоаси учун ҳам бор-йўғи икки марта ўйнаган бўлса, «Лион» сафида еттита учрашув ўтказди. Шундан кейин футболчи «Страсбург»га сотилди.
Морейра айнан шу жамоада ўзини топа олди. Аммо бундай йўлдан кейин савол туғилади: «Челси» уни аслида нима мақсадда сотиб олган эди?
Денис Закария
Бир вақтлар Закария Европанинг энг талабгир яримҳимоячиларидан бири эди. Аммо 2022 йилда «Челси» уни ижарага олган пайтга келиб, бу давр ортда қолганди.
Унинг январда «Ювентус»га трансфери ўхшамади ва «Челси» таваккал қилишга қарор қилди. Бироқ Закария АПЛдаги дебютини фақат католик Рождествосидан кейин ўтказди.
Умуман олганда, швейцариялик футболчи «Челси» сафида бор-йўғи 11 та учрашувда майдонга тушди.
Матис Амугу
«Челси»да Амугуни кўпчилик умуман эсламаса керак. У 2025 йил февраль ойида «Сент-Этьен»дан кўчиб ўтганидан кейин клуб сафида атиги икки марта майдонга тушди. Ҳар икки учрашувда ҳам 22 дақиқадан ўйнади.
Қизиғи, яримҳимоячига саккиз йиллик шартнома таклиф қилинган эди. Аммо трансфердан атиги беш ой ўтиб, у сотиб юборилди. Албатта, яна «Страсбург»га.
Маълумотларга кўра, «Челси» Амугуни бир неча йил давомида кузатган. Бироқ ўша пайтдаги бош мураббий Мареска уни жамоага ёрдам бера оладиган футболчи сифатида ҳеч қачон кўрмаган.
Жоау Феликс
Феликс билан биринчи ҳамкорлик унчалик яхши чиқмаганидан кейин уни иккинчи марта сотиб олиш ҳам анча ғалати қарор эди.
Тўғри, унинг 2022/23 йилги мавсумнинг иккинчи ярмидаги ижараси ҳам мутлақо ёмон ўтмаган: 20 та ўйинда тўртта гол.
Бироқ Феликс кутилган даражани кўрсата олмади ва «Челси» уни доимий равишда сотиб олиш вариантни кўриб чиқмади.
Шунга қарамай, бир йил ўтиб, бу яна содир бўлди. «Челси» ҳужумчини тўлиқ трансфер асосида сотиб олди, тарбияланувчиси Конор Галлахер эса қарама-қарши йўналишда — «Атлетико»га йўл олди.
Галлахернинг сотилиши «Челси» мухлисларининг бир қисмини хафа қилди. Аммо Феликснинг кейинги фаолияти бу қарордан ҳам кўпроқ норозилик уйғотди.
Атиги олти ойдан сўнг португалиялик футболчи яна бошқа клубда пайдо бўлди — бу сафар «Милан»га ижарага берилди.
