Бензема, Погба, Рамос ва Карвахаль: Жамоасиз қолган 10 футболчи
Европанинг асосий чемпионатларида ёзги трансфер ойнаси ёпилди. Энди клублар шартномаси бор футболчиларни трансфер қила олмайди, бироқ эркин агентлар бозори ҳали ҳам очиқ. Шу сабабли бир қатор машҳур футболчилар янги жамоа топиш имкониятига эга. Ҳозирда клубсиз қолаётган энг номдор футболчилар рўйхатини эълон қиламиз.
Дарвозабон — Нето
Дарвозага бразилиялик Нето жойлаштирилган. 36 ёшли голкипер Европада «Фиорентина», «Ювентус», «Валенсия» ва «Барселона» каби клубларда тўп тепган. Кейинчалик Англиянинг «Борнмут» жамоаси сафида ҳам ҳаракат қилган.
Унинг сўнгги клуби Бразилиянинг «Ботафого»си бўлди. Нето 2026 йил июнь ойида клуб билан шартномасини ўзаро келишув асосида бекор қилди ва эркин агентга айланди.
Ҳимоя — Карвахаль, Рамос, Алаба ва Зинченко
Ўнг қанот ҳимоясида Дани Карвахаль. Испаниялик футболчи бутун профессионал фаолиятининг катта қисмини «Реал» билан боғлади. Мадрид клуби сафида 450 та ўйин ўтказиб, 27 та совринни қўлга киритди. Унинг коллекциясида олтита Карвахаль 2026 йил ёзида «Реал»ни тарк этди. Клуб билан шартномани узайтириш бўйича келишувга эришилмади ва у эркин агент мақомига эга бўлди.
Марказий ҳимояда эса икки тажрибали футболчи — Серхио Рамос ва Давид Алаба.
Рамос — «Реал» ва Испания терма жамоаси билан бир қатор йирик совринларни қўлга киритган ҳимоячилардан бири. Испаниялик футболчи Мадрид клуби билан бир неча марта Чемпионлар лигасида ғолиб чиққан, жаҳон ва Европа чемпиони бўлган.
Алаба эса «Бавария» ва «Реал» сафида Европа футболидаги энг юқори даражадаги совринларни қўлга киритган. Австриялик футболчи универсаллиги билан ажралиб туради — у марказий ҳимояда ҳам, чап қанотда ҳам, таянч ярим ҳимояда ҳам ҳаракат қила олади.
Чап қанотда Александр Зинченко жойлаштирилган. Украина терма жамоаси футболчиси «Манчестер Сити» билан Англия чемпионати ва Чемпионлар лигасида совринлар қўлга киритган, кейин «Арсенал»да ҳам тўп тепди. Унинг эркин агентга айланиши рўйхатдаги энг қизиқ ҳолатлардан бири бўлди. Шу билан бирга, Зинченко жароҳатидан тикланиш жараёнида экани ва яқин ойларда майдонга туша олмаслиги қайд этилган.
Ярим ҳимоя — Биссума, Погба
Марказда Ив Биссума ва Пол Погба ҳаракат қилиши кўзда тутилган.
Кот-д'Ивуарлик Биссума Англия Премьер-лигасида «Брайтон» ва «Тоттенхэм» сафида ўйнаган таянч ярим ҳимоячи сифатида танилган. У жисмоний курашлардаги фаоллиги ва тўпни олиб қўйишдаги маҳорати билан ажралиб туради.
Погба эса ушбу таркибдаги энг катта номлардан бири. 2018 йил жаҳон чемпиони бўлган француз футболчиси «Ювентус» ва «Манчестер Юнайтед» сафида катта ютуқларга эришган.
У 2025 йил ёзида «Монако»га ўтган эди. Бироқ француз клуби билан шартномаси 2027 йил июнига қадар амал қилиши керак бўлганига қарамай, томонлар 2026 йил август ойида ҳамкорликни муддатидан олдин якунлашга қарор қилди. Погба «Монако»да бор-йўғи олтита учрашувда майдонга тушган.
Ҳужум — Маҳрез, Бензема ва Санчо
Ҳужум чизиғининг ўнг қанотида Рияд Маҳрез. Жазоирлик футболчи «Лестер Сити» билан Англия чемпионлигини қўлга киритган, «Манчестер Сити» сафида эса Премьер-лига ва Чемпионлар лигаси каби муҳим совринларни ютиб олган.
Маҳрез кейин Саудия Арабистонининг «Ал-Аҳли» клубига ўтди. У жамоа сафида уч мавсум ўтказиб, барча мусобақаларда 122 та учрашувда 37 та гол урди ва икки марта Осиё Чемпионлар лигасида ғолиб чиқди. 2026 йил ёзида унинг «Ал-Аҳли» билан шартномаси якунланди.
Чап қанотда эса Жейдон Санчо. Англиялик вингер «Боруссия Дортмунд»даги ўйинлари орқали Европанинг энг иқтидорли ёш футболчиларидан бири сифатида танилган. Кейин «Манчестер Юнайтед»га катта трансфер эвазига ўтган. У 2025/26 мавсумни «Астон Вилла»да ижара асосида ўтказиб, Европа Лигасида ғолиб чиққанидан кейин «Манчестер Юнайтед» билан шартномаси якунланди.
Ҳужум марказида эса ушбу таркибнинг энг катта юлдузи — Карим Бензема.
«Реал» тарихидаги энг сермаҳсул футболчилардан бири бўлган француз ҳужумчиси Мадрид клуби билан беш марта Чемпионлар лигасида ғолиб чиққан ва 2022 йилда «Олтин тўп»ни қўлга киритган.
Бензема 2023 йилда «Ал-Иттиҳод»га ўтиб, Саудия Арабистонида фаолиятини давом эттирди. 2026 йил февраль ойида эса «Ал-Ҳилол» билан 1,5 йиллик шартнома имзолаган эди. Бироқ 31 август куни клуб ва футболчи шартномани ўзаро келишув асосида бекор қилишди. Шу тариқа 38 ёшли Бензема ҳам эркин агентлар рўйхатига қўшилди.
