2026 йил ёзида амалга ошмай қолган энг қиммат трансферлар
2026 йилги ёзги трансфер ойнаси Европа футболи тарихидаги энг серхаражат даврлардан бири бўлди. Бироқ катта маблағлар айланмаси фонида бир қатор йирик трансферлар ҳам сўнгги паллада барбод бўлди. Айрим келишувларда клублар ўзаро нарх бўйича келишиб бўлган, баъзи футболчилар тиббий кўрикдан ҳам ўтган, аммо ҳужжатларни расмийлаштириш ёки томонларнинг якуний қарори сабаб битимлар амалга ошмаган.
Қуйида 2026 йил ёзида амалга ошмай қолган энг қиммат ва эътиборга молик трансферлар ҳақида.
1. Хулиан Альварес — «Реал» ва «Барселона»га ўтмади
Мўлжалланган клублар: «Реал» Мадрид / «Барселона»
Амалдаги клуби: «Атлетико»
Таклиф: 150 млн еврогача
Ёзги трансфер ойнасидаги энг катта амалга ошмаган битимлардан бири Хулиан Альварес билан боғлиқ бўлди. «Реал» Мадрид аргентиналик ҳужумчи учун «Атлетико»га 150 миллион евролик таклиф билан чиққан, аммо мадридликлар бу таклифни рад этган. Шу билан бирга, «Барселона» ҳам Альваресни таркибига қўшишга жиддий қизиққан. Бироқ «Атлетико» футболчини сотиш ниятида эмаслигини бир неча бор билдирган. Клуб ҳатто Альвареснинг шартномасидаги 500 миллион евролик товон пулига ишора қилган. Натижада 26 ёшли футболчи «Атлетико»да қолди.
2. Ламин Камара — «Челси»га ўтиши сўнгги паллада бекор бўлди
Мўлжалланган клуб: «Челси»
Амалдаги клуби: «Монако»
Трансфер қиймати: 47 млн евро атрофида
Ламин Камаранинг «Челси»га трансфери ҳам ёзнинг энг шов-шувли амалга ошмаган битимларидан бири бўлди. «Челси» сенегаллик ярим ҳимоячи учун 47 миллион фунт тўлашга келишган ва футболчи Лондонда тиббий кўрикдан ўтиши керак эди. У ҳатто олти йиллик шартнома имзолаши кутилган. Бироқ трансфер ойнаси ёпилишига оз вақт қолганида «Монако» келишувдан воз кечди. Франция клуби ўз қарорини «Челси»га ёзма равишда билдирган. Бу воқеа «Челси» учун айниқса муҳим эди, чунки лондонликлар Энцо Фернандесни «Манчестер Сити»га 125 миллион фунтга сотганидан кейин унинг ўрнига Камарани олиб келишни режалаштирган эди.
3. Эдерсон — «Манчестер Юнайтед»га ўтишидан бир қадам қолганда
Мўлжалланган клуб: «Манчестер Юнайтед»
Амалдаги клуби: «Аталанта»
Келишилган сумма: 45 млн евро атрофида
Эдерсоннинг «Аталанта»дан «Манчестер Юнайтед»га трансфери деярли ҳал бўлган эди. Клублар 45 миллион евро атрофида келишувга эришган.
Бразилиялик футболчи ҳатто тиббий кўрикнинг биринчи қисмидан ўтган. Кейин жаҳон чемпионатида иштирок этиш учун терма жамоа ихтиёрига жўнаган ва мусобақадан кейин қўшимча тиббий текширувлардан ўтган. Бироқ 10 июль куни «Манчестер Юнайтед» «Аталанта»га битимни расмийлаштиришни давом эттирмаслигини маълум қилди.
Шу тариқа, трансфер бекор бўлди ва Эдерсон Бергамода қолди. Кейинчалик у «Аталанта» билан шартномасини 2031 йилгача узайтирди.
4. Фоларин Балогун — «Эвертон»га ўтишдан бош тортди
Мўлжалланган клуб: «Эвертон»
Амалдаги клуби: «Монако»
Тахминий сумма: 40 млн фунт
Фоларин Балогуннинг «Монако»дан «Эвертон»га трансфери ҳам трансфер ойнасининг сўнгги кунида амалга ошмай қолди. Келишув қиймати тахминан 40 миллион фунтга баҳоланган. Бироқ футболчининг тиббий кўриги жараёнида муаммо пайдо бўлган ва «Эвертон» шартларни қайта кўриб чиқишга уринган.
Бундан ташқари, Балогуннинг Англияга учиши кечиккан, «Монако» эса зарур ҳужжатларни ўз вақтида тақдим этишда муаммоларга дуч келган. Ҳатто трансфер ойнаси ёпилишидан олдин битим варақаси топширилган бўлса-да, якунда футболчининг ўзи «Монако»да қолишга қарор қилган.
5. Марко Палестра — «Интер»дан «Челси»га ўтиб кетди
Мўлжалланган клуб: «Интер»
Амалдаги клуби: «Аталанта»дан «Челси»га
«Интер» таклифи: 40 млн евро+ 5 млн бонус евро
Марко Палестра бўйича «Интер» «Аталанта»га 40 миллион евро + 5 миллион евро бонус таклиф қилган. Миланликлар футболчининг агенти билан ҳам учрашиб, унга мавсумий 2,5 миллион евро маош таклиф қилган.
Бироқ сўнгги паллада «Челси» трансферга аралашди. Лондон клуби юқорироқ таклиф билан чиқиб, Палестрани қўлга киритди.
Натижада «Интер»нинг режаси амалга ошмади, Палестра эса «Челси»га 57 миллион евро + 3 миллион евро бонус эвазига ўтди.
6. Зион Сузуки — «ПСЖ» трансферни якунлай олмади
Мўлжалланган клуб: ПСЖ
Амалдаги клуби: «Парма»дан «Астон Вилла»га
«ПСЖ» таклифи: 35 млн еврогача.
«ПСЖ» ёзда «Парма» дарвозабони Зион Сузукини таркибига қўшишга жиддий ҳаракат қилди. Франция клуби дастлаб 28 миллион евро + бонуслар таклиф қилди. Бу таклиф рад этилгач, ПСЖ умумий қиймати 35 миллион еврогача бўлган янги таклиф тайёрлади.
Бироқ музокаралар давомида «Астон Вилла» ишга қўшилди ва 16 август куни «Парма» билан айнан 35 миллион евро, бонуслар билан бирга баҳоланган келишувга эришди.
Шу тариқа, ПСЖнинг Сузукини олиш режаси амалга ошмади.
7. Луиз Энрике — «Рома» трансферни якунлай олмади
Мўлжалланган клуб: «Рома»
Амалдаги клуби: «Зенит»
Келишув: 5 млн евролик ижара + 30 млн еврога сотиб олиш ҳуқуқи
«Рома» Луиз Энрикени «Зенит»дан олиб келишга жуда яқин келган. Италия клуби 5 миллион евро тўловли ижара ва 30 миллион евро атрофидаги сотиб олиш ҳуқуқи бўйича келишув устида ишлаган. Клублар ва футболчининг ўзи билан ҳам принципиал келишувга эришилган.
Бироқ якунда айрим техник муаммолар туфайли битим расмийлаштирилмади.
