TIIF doirasida Generations United tennis turniri bo‘lib o‘tdi
Toshkent shahridagi Olimpiya shaharchasida ACWA Power va O‘zbekiston Tennis Federatsiyasi hamkorligida “Generations United Tennis Series” tennis turniri tashkil etildi.
Tadbir Toshkent xalqaro investitsiya forumi (TIIF) sport dasturi doirasida o‘tkazilib, turli avlod vakillari, biznes hamjamiyati a’zolari, xalqaro delegatsiyalar hamda tennis ixlosmandlarini bir maydonda jamladi.
“Generations United” tashabbusi avlodlar o‘rtasidagi muloqotni rivojlantirish, mentorlik madaniyatini qo‘llab-quvvatlash, tajriba almashish imkoniyatlarini kengaytirish hamda sport orqali ijtimoiy aloqalarni mustahkamlashga qaratilgan.
Tadbir dasturidan avlodlararo tennis bo‘yicha mahorat darsi, “Generations United Tie-Break Slam” musobaqasi hamda forum ishtirokchilari ishtirokidagi tennis bahslari o‘rin oldi.
O‘zbekiston Tennis Federatsiyasi tennis sportini ommalashtirish, sog‘lom turmush tarzini targ‘ib qilish va jamiyatning turli qatlamlari o‘rtasidagi hamkorlikni mustahkamlashga qaratilgan bunday loyihalarni qo‘llab-quvvatlashda davom etadi.
