Tennis. O‘zbekiston ayollar terma jamoasi Billie Jean King Cup’dagi ishtirokini o‘tgan yilgi natijani yaxshilagan holda yakunladi
Malayziyada bo‘lib o‘tgan Billie Jean King Cup Asia/Oceania Group II musobaqasida O‘zbekiston ayollar terma jamoasi o‘tgan yilgiga nisbatan muvaffaqiyatliroq ishtirok etdi.
Terma jamoamiz guruh bosqichidan muvaffaqiyatli chiqib, Asia/Oceania Group I yo‘llanmasi uchun pley-off bahslarida ishtirok etdi.
Yarim finalda O‘zbekiston terma jamoasi Filippinga qarshi kortga chiqdi. Birinchi yakkalik uchrashuvida Nigina Alimova Tennielle Madisga 4:6, 5:7 hisobida imkoniyatni boy berdi. Ikkinchi yakkalik bahsida esa Sevil Yo‘ldasheva Shaira Riverani 6:3, 7:5 hisobida mag‘lub etib, umumiy hisobni tenglashtirdi.
Hal qiluvchi juftlik uchrashuvida Nigina Alimova va Sevil Yo‘ldasheva Alexa Joy Milliam hamda Shaira Riveraga qarshi bahs olib borishdi. Murosasiz kechgan uchrashuv 6:4, 3:6, 6:10 hisobida yakunlandi va Group I yo‘llanmasi super tay-breykda hal bo‘ldi.
Natijada O‘zbekiston terma jamoasi kelasi mavsum ham Asia/Oceania Group II musobaqasida ishtirok etadi.
Shunga qaramay, jamoamiz o‘tgan yilgi natijasini sezilarli darajada yaxshiladi. Agar 2025-yilda O‘zbekiston 8-o‘rinni egallagan bo‘lsa, bu yil guruh bosqichidan muvaffaqiyatli chiqib, turnirning eng kuchli to‘rt jamoasi qatoridan joy oldi hamda Asia/Oceania Group I yo‘llanmasi uchun oxirigacha kurash olib borib, hal qiluvchi juftlik uchrashuvidagi super tay-breykda imkoniyatni boy berdi.
