Sobolenko Sintsinnatida chorak finalga chiqa olmadi
«Katta Shlem» turnirlarining to‘rt karra chempioni, dunyodagi birinchi raqamli tennischi Arina Sobolenko AQShning Sintsinnati shahrida o‘tkazilayotgan WTA-1000 turnirida chorak finalga chiqa olmadi.
Belaruslik tennischi 1/8 final bosqichida jahon reytingida 35-o‘rinda turgan chexiyalik Sara Beylekka 6:7 (7:9), 4:6 hisobida imkoniyatni boy berdi. Uchrashuv 1 soat 55 daqiqa davom etdi.
Sobolenko bahs davomida biror marta eys qayd etmadi, 4 ta qo‘sh xatoga yo‘l qo‘ydi va breyk-pointlarning 6 tasidan 4 tasidan unumli foydalandi. Beylek esa 3 ta eys ishladi, qo‘sh xato qilmadi va 11 ta breyk-pointdan 5 tasini muvaffaqiyatli yakunladi.
Shu tariqa, 20 yoshli Beylek faoliyatida ilk bor WTA-1000 turnirining chorak finaliga yo‘l oldi. Bu uning jahon reytingidagi birinchi raqamli tennischi ustidan ham ilk g‘alabasi bo‘ldi.
