O‘zbekiston tennischilari Indoneziyaga qarshi bahsda omadsiz o‘yin namoyish etdi
Malayziyaning Kuala-Lumpur shahrida ayollar o‘rtasidagi nufuzli Billie Jean King kubogi — norasmiy jahon chempionati davom etmoqda. Musobaqaning II Osiyo/Okeaniya guruhi doirasida bugun O‘zbekiston terma jamoasi Indoneziyaga qarshi maydonga tushdi.
Birinchi bahsda mamlakatimizning uchinchi raqetkasi Darya Shubina Anjali Kirana Junarto bilan kuch sinashdi va jiddiy qarshilik ko‘rsatganiga qaramay, 0:2 (6/7, 6/7) hisobida yutqazdi.
Ikkinchi o‘yinda kutilmaganda Nigina Abdurayimovani Sabrina Olimjonova almashtirdi. U ishonchni oqlab, Mishka Sinclaire Goenadini 2:0 (6/3, 6/3) hisobida mag‘lub etdi.
Qarorli juftlik bahsida Abdurayimova/Shubina dueti indoneziyalik raqibalarga qarshi kurash olib bordi, ammo yanada tajribali raqiblarga 0:2 (6/7, 5/7) hisobida imkoniyatni boy berdi.
Shu tariqa, Oqgul Omonmurodova boshchiligidagi tennischilar musobaqadagi ikkinchi uchrashuvini ham mag‘lubiyat bilan yakunlashdi.
