Myunxen va Barselonada bo'lib o'tgan ATP 500 turnirlari g'oliblari ma'lum bo'ldi
Barselonadagi finalda norvegiyalik Xolger Rune va ispanlik Karlos Alkaras to'qnash keldi. Hal qiluvchi bahsda Karlos Alkaras Xolger Runega 6:7(6), 2:6 hisobida mag'lub bo'ldi. Rune shuningdek, raqibining to'qqiz uchrashuvdan iborat g'alabali seriyasiga chek qo'ydi. Shunga qaramay, shaxsiy o'yinlarda Alkaras hozircha 3:2 hisobida oldinda. 21 yoshli Rune uchun bu faoliyatidagi beshinchi chempionlikdir. Kataloniyadagi muvaffaqiyat unga 500 reyting ochkosi va 535 185 yevro mukofot puli olib keldi.
Myunxen (Germaniya)dagi finalda esa Germaniya vakili Aleksandr Zverev hamda AQSh tennischisi Ben Shelton o'zaro kurash olib bordi. ATP reytingida uchinchi o'rinda turuvchi Aleksandr Zverev bosh sovrinni qo'lga kiritdi. U 15-raqam ostida turnirda qatnashgan Ben Sheltonni osonlikcha 6:2, 6:4 hisobida mag'lub etdi. Qiziq tomoni shundaki, Zverev ushbu g'alabani tug'ilgan kunida qo'lga kiritdi.
U ijtimoiy tarmoqlarda quyidagicha yozdi:
«Nima ham derdim, bu baxtli tug'ilgan kun bo'ldi! O'z yurtimda g'alaba qozonish har doim yoqimli! Bir hafta davomidagi qo'llab-quvvatlov uchun rahmat!»
Tennischilar uchun navbatdagi musobaqa Rim shahrida bo'lib o'tadigan ATP 1000 va WTA Masters turniridir.