Maksim Shin Tashkent M15 musobaqasida yarim final oldidan to'xtadi
Shu kunlarda Toshkent shahridagi “Yunusobod” sport majmuasida tennis bo‘yicha ITF turkumiga kiruvchi M15 musobaqasi qizg‘in pallaga kirdi. Unda o‘zbekistonlik bir qator tennischilar ishtirok etdi.
Amir Milushev, Damir Abdusamadov, Botir Sapaev va Abdulaziz Usmonjonov musobaqaning dastlabki bosqichlarida mag‘lubiyatga uchrashdi. Ammo Maksim Shin musobaqada yuqori natija qayd etishga muvaffaq bo‘ldi.
Shin avval neytral maqomda ishtirok etgan Aleksey Aleshchyovni mag‘lub etdi. Keyin esa reytingda 640-pog‘onada joylashgan, musobaqaning uchinchi raqamli tennischisi rossiyalik Maksim Jukov ustidan muhim g‘alabani qo‘lga kiritdi. Bu natija yosh tennischimiz uchun katta yutuq bo‘ldi.
Afsuski, chorak finalda Shin hindistonlik Krish Tiyagiga qarshi taybrekda imkoniyatni boy berdi. Shu tariqa, Toshkentdagi M15 musobaqasida o‘zbekistonlik tennischilarning eng yaxshi natijasi 1/4 finalga chiqish bilan cheklandi.
