Billie Jean King Cup: O‘zbekiston terma jamoasi Yangi Kaledoniyaga ham yutqazdi
Malayziyaning Kuala-Lumpur shahrida ayollar o‘rtasidagi tennis bo‘yicha Billie Jean King kubogi – norasmiy Jahon chempionati qizg‘in pallaga kirdi. Musobaqaning II Osiyo/Okeaniya guruhida ishtirok etayotgan O‘zbekiston terma jamoasi uchun bu galgi bahs ham omadli kechmadi. Yurtdosh tennischilarimiz mitti orol davlati — Yangi Kaledoniya terma jamoasiga mag‘lub bo‘lishdi.
Birinchi uchrashuvda mamlakatimizning uchinchi raqamli tennischisi Darya Shubina reytingga ega bo‘lmagan Violet Apisaxga 6/7(5), 0/6 hisobida yutqazdi. Ikkinchi o‘yinda esa Sabrina Olimjonova yuzini saqlab qoldi — u Karolann Delaunayni 6/2, 6/2 hisobida mag‘lubiyatga uchratib, hisobni 1:1 ko‘rinishiga keltirdi.
Hal qiluvchi juftlik bellashuvida Shubina va Nigina Abdurayimova dueti Patrisiya va Violet Apisax juftiga qarshi maydonga tushdi. Teng va dramatik kechgan o‘yinda o‘zbekistonliklar 1/6, 7/6(9), tay-brekda 9:11 hisobida mag‘lubiyatga uchradilar.
Shu tariqa, terma jamoamiz musobaqada ketma-ket uchinchi mag‘lubiyatini qayd etdi. Bundan avval Filippin va Indoneziya terma jamoalariga ham yutqazgan edik.
Endi terma jamoamizni amalda hech narsa hal qilmaydigan so‘nggi bahs — Eron terma jamoasiga qarshi uchrashuv kutmoqda.
