Yangi O‘zbekiston yoshlari Osiyo o‘yinlarida ikkinchi o‘rinni egallashdi
O‘zbekiston delegatsiyasi Bahraynda yakuniga yetayotgan III Osiyo yoshlar o‘yinlaridagi ishtirokini tugatdi.
Qit’amizning 45 mamlakatidan 4000 nafardan ortiq yosh sportchi ishtirok etgan ushbu musobaqada yosh atletlarimiz yuqori mahorat va jasorat ko‘rsatib, murosasiz bellashuvlarda 37 ta oltin, 16 ta kumush va 28 ta bronza, jami 81 ta medal bilan umumjamoa hisobida Xitoydan keyin faxrli ikkinchi o‘rinni egallashdi.
Ushbu natijaning tarixiyligi shundaki, delegatsiyamiz I Osiyo yoshlar o‘yinlarida 3 ta bronza, II o‘yinlarda esa 1 ta oltin, 2 ta kumush va 3 ta bronza medallarini qo‘lga kiritgan bo‘lsa, bu gal ushbu raqamlar ancha salmoqli ko‘rinish oldi.
Shubhasiz, bunday natija ortida muhtaram Prezidentimiz tomonidan nafaqat professional, balki yoshlar sportiga ham qaratilayotgan ulkan e’tibor va g‘amxo‘rlik turibdi, desak mubolag‘a bo‘lmaydi.
