«Yangi O‘zbekiston Olimpiya cho‘qqilari» musobaqasining engil atletika bo‘yicha g‘oliblari aniqlandi
Andijon shahrida 27-28 avgust kunlari “Yangi O‘zbekiston Olimpiya cho‘qqilari” musobaqasi doirasida engil atletikaning balandlikka sakrash, uzunlikka sakrash, uchhatlab sakrash, nayza uloqtirish, yadro itqitish, bosqon uloqtirish, g‘ovlar osha yugurish va to‘siqlar osha yugurish yo‘nalishlari bo‘yicha bahslar tashkil etildi.
Hududiy bosqichda jami 144 nafar sportchi g‘oliblik uchun o‘zaro kuch sinashib, musobaqa davomida yosh atletlar o‘zlarining iqtidori va mahoratini namoyon etdilar.
Musobaqa yakunida o‘z yo‘nalishlarida g‘oliblikni qo‘lga kiritgan sportchilar tantanali tarzda taqdirlanib, ularga diplom, medal va esdalik sovg‘alari topshirildi.
Eng quvonarlisi shundaki, musobaqada eng yaxshi natija ko‘rsatgan sportchilar musobaqaning “Prezident olimpiadasi” respublika bosqichida ishtirok etish imkoniyatini qo‘lga kiritdilar.
