Yan Nepomnyashiy FIDE reytingining eng kuchli o'ntaligidan chiqib ketdi
34 yoshli rossiyalik grossmeyster Yan Nepomnyashiy Xalqaro shaxmat federatsiyasi (FIDE) reytingidagi eng kuchli 10 shaxmatchi ro'yxatidan chiqib ketdi. U Toshkentda bo'lib o'tgan “UzChess Cup 2025” xalqaro musobaqasida 9 partiyada atigi 3,5 ochko jamg'ardi va reytingda 2742 ochko bilan 10-o'rindan 14-pog'onaga tushdi.
FIDE reytingining yetakchisi — norvegiyalik Magnus Karlsen (2839 ochko). Undan keyingi o'rinlarda AQSh vakillari Hikaru Nakamura (2807) va Fabiano Karuana (2784) joy olgan.
4–6-o'rinlarda Hindiston shaxmatchilari Rameshbabu Pragnanandha (2779), Arjun Erigayisi (2776) va Gukesh Dommaraj (2776) qayd etilgan. O'zbekiston sharafini himoya qilayotgan Nodirbek Abdusattorov 2771 ochko bilan 7-o'rinda bormoqda. Undan so'ng fransuz Alireza Firuzja (2766), xitoylik Vey I (2748) va niderlandiyalik Anish Giri (2748) joylashgan.
