Xorazmda IV-Markaziy Osiyo xalqaro kurash turniri boshlandi

Boshqa sport turlari 18 apr 2025 da 14:44

Ibrohim Jalolov

Urganch shahridagi “Yoshlik” sport majmuasida O‘zbekiston Respublikasi Prezidenti sovrini uchun Pahlavon Mahmud xotirasiga bag‘ishlangan IV-Markaziy Osiyo xalqaro kurash turniri boshlandi.

Turnirning rasmiy ochilish marosimi ko‘tarinki ruhda o‘tdi. Bayramona bezatilgan sport majmuasida minglab tomoshabinlar ishtirokida musobaqaga tashrif buyurgan davlatlar vakillari gilamga chiqib kelishdi.

Tadbirni Xorazm viloyati hokimi o‘rinbosari San’atbek Salayev ochib berdi. U o‘z nutqida turnirning tarixiy va ma’naviy ahamiyatini alohida ta’kidlab, Pahlavon Mahmud merosi zamirida kurashga xos jasorat, vatanparvarlik va do‘stlik kabi oliy qadriyatlar mujassamligini ta’kidladi. Shuningdek, ushbu musobaqa nafaqat kurash sportini yanada ommalashtirish, balki Markaziy Osiyo xalqlari o‘rtasidagi do‘stlik rishtalarini yanada mustahkamlash yo‘lida muhim qadam bo‘lishini bildirdi.

Madaniy dasturdan so‘ng bahslarga rasmiy start berildi. Afg‘oniston, Turkmaniston, Tojikiston, Qirg‘iziston va O‘zbekistondan 70 nafardan ortiq sportchilar ishtirok etayotgan musobaqani Hikmat Kurtov boshchiligidagi 20 nafar IKA hakamlari jamoasi boshqarib bormoqda.